Pogba: Do të ishte kënaqësi të luaja me Neymarin

Paul Pogba ka thënë se do të ishte kënaqësi nëse në të ardhmen do t’i jepej mundësia të luante me Neymarin në të njëjtën skuadër.

Sulmuesi brazilian theu rekordin e mesfushorit të Manchester Unitedit kur u transferua te Paris Saint-Germaini duke u bërë lojtari më i shtrenjtë në histori.

Ndërsa francezi 25 vjeçar ka simpati për lojën e brazilianit 26 vjeçar, i cili aktualisht është duke u rikuperuar nga një frakturë në ashtin metatarsal të këmbës së djathtë.

Lexo po ashtu Të gjitha lajmet për PAUL POGBA

“Po, Neymari. Më pëlqen. Ai e ka definicionin e lumturisë në fushë”, ka thënë Pogba për kanalin televiziv argjentinas, TyC Sports.

“Në Brazil, futbolli është gjithçka, është jetë në Brazil. Të gjithë luajnë futboll. Më pëlqen ta shoh duke luajtur në fushë, me teknikën dhe aftësitë e tij. Është një stil tjetër”.

“Kur e thua fjalën ‘Neymar’ anekënd botës, të gjithë e dinë se kush është ai dhe çfarë bën. Prandaj, nëse do të luaja me të një ditë, do të ishte kënaqësi”, ka theksuar francezi.

Gjatë intervistës, Pogba ka treguar edhe për futbollistët tjerë, të cilët i ka shikuar kur ka qenë i vogël dhe ata që i shikon tash. /Telegrafi/