Pas konfirmimit të aktakuzës së Thaçit, Meta: Lufta e UÇK-së ka qenë e drejtë dhe heroike

Presidenti i Shqipërisë, Ilir Meta ka reaguar pas konfirmimit të aktakuzës nga Gjykata Speciale ndaj ish-presidentit Hashim Thaçi.

Meta me anë të një shkrimi në Facebook, ka thënë se, lufta e Ushtrisë Çlirimtare të Kosovës ka qenë e drejtë dhe heroike.

“Lufta e Ushtrisë Çlirimtare të Kosovës ka qenë e drejtë dhe heroike. Vlerësoj aktin e dorëheqjes së Presidentit të Republikës së Kosovës, Hashim Thaçi, për t’u ballafaquar me akuzat dhe besoj në pafajësinë e Tij e të gjithë bashkëluftëtarëve, sikundër është konfirmuar edhe në të kaluarën. Ky është një moment reflektimi për të forcuar më shumë bashkëpunimin dhe unitetin, në interesin më të mirë kombëtar”, shkruan Meta.

Presidenti Thaçi në një konferencë për media ka bërë të ditur se, Gjykata Speciale ka konfirmuar aktakuzën ndaj tij.

Kujtojmë se, më 24 qershor, Zyra e Prokurorit të Specializuar, ka njoftuar se më 24 prill u ka dërguar Dhomave të Specializuara të Kosovës, me seli në Hagë, një aktakuzë me dhjetë pika për shqyrtim, në të cilën presidenti Thaçi, kryetari i Partisë Demokratike të Kosovës, Kadri Veseli dhe të tjerë, akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura. /Telegrafi/