Mustafa: Pakoja e Ahtisaarit s’është Bibël, e as Kuran, por duhet të respektohet

Kryeministri i vendit, Isa Mustafa tha të enjten se e vlerëson shumë opinionin e profesorit Marc Weller dhe është i vetëdijshëm që Pakoja e Ahtisaarit nuk është Bibël dhe Kuran, por sipas kryeministrit  pavarësia e Kosovës është shpallur mbi këtë Pako dhe duhet të respektohet.

Lexo po ashtu Opinion i profesorit Marc Weller, lidhur me vlefshmërinë e kufirit mes Kosovës dhe Malit të Zi

Lexoni të plotë postimin e kryeministrit në Facebook:

“Unë e vlerësoj shumë opinionin e profesorit Marc Weller. Por nuk i vlerësoj argumentet ‘shkencore’ të atyre që në tryezën e 3 gushtit merreshin me këngë malazeze dhe thonin se Pakoja e Ahtisarit nuk është Bibël as Kuran. Që nuk është Bibël dhe Kuran e dijmë, por pavarësinë e kemi shpallur mbi këtë Pako dhe jemi betuar me Deklaratë të Pavarësisë që do ta respektojmë. Prandaj nuk ka nevojë të keqinterpretohem”.

Ndryshe, nëpërmjet një e-maili, Qeveria e Kosovës ka shpërndarë një opinion ligjor të profesorit të së drejtës ndërkombëtare dhe të studimeve kushtetuese ndërkombëtare, Marc Weller.

Opinioni ka të bëjë me vlefshmërinë e kufirit mes Republikës së Kosovës dhe Republikës së Malit të Zi siç përcaktohet me demarkimin e kufirit të ndërmarrë nga Komisioni Shtetëror për Shënjimin dhe Mirëmbajtjen e Kufirit Shtetëror dhe reflektimi në Marrëveshjen e Vjenës të 26 gushtit të vitit 2015. /Telegrafi/