Mospajtimet LVV-LDK për postin e presidentit, analistët tregojnë formulën e marrëveshjes

Që nga takimi i datës 2 dhjetor, kreu i Lëvizjes Vetëvendosje, Albin Kurti dhe kreu i Lidhjes Demokratike të Kosovës, Isa Mustafa nuk janë takuar më. Nga takimi i fundit u bë e ditur se kanë disa dallime dhe se takimet do të vazhdojnë drejt arritjes së një marrëveshje për koalicion qeverisës.

Që nga të dyja partitë kanë pohuar se kanë vullnet të formojnë qeverinë e re të Kosovës. Mirëpo, siç kanë thënë nga LVV, është LDK ajo e cila po e kushtëzon arritjen e marrëveshjes me postin e presidentit.

Lidhur me bisedimet që po bëhen mes LVV-së dhe LDK-së, është deklaruar njohësi i çështjeve politike, Blerim Vela.

Ai tha se pas takimit të fundit mes Kurtit dhe Mustfës, po vërehet një tendosje e raporteve dhe jo përafrim të qëndrimeve.

“Parimisht, përderisa nuk është konstituar përbërja e re e Kuvendit dhe të jetë bërë caktimi i mandatarit për formimin e qeverisë, nuk kemi të bëjmë me zvarritje të formimit të qeverisë. Megjithatë, mungesa e takimeve në rang të liderëve të LVV-së dhe LDK-së nga 2 dhjetori, si dhe reagimet e zyrtarëve partiak pas takimit të fundit, tregojnë që ka tendosje të raporteve dhe jo përafrim të qëndrimeve. Kryefjala e mospajtimit mes LVV dhe LDK-së, është se cilat ministri do t’i udhëheqin dhe zgjedhja e presidentit të ri në vitin 2021. Në esencë, qëndrimet e tyre të shprehura nga zyrtarët partiakë tregojnë që në themel të mospajtimit të tyre qëndron mosbesimi mes parterëve të ardhshëm qeverisës”, ka thënë Vela, për Telegrafin.

Vela tha se në njërën anë LDK nuk i beson LVV-së të udhëheq me të gjitha ministritë që lidhen me sundimin e ligjit, si dhe tema e zgjedhjes së presidentit të ri adresohet jashtë marrëveshjes për Qeverinë dhe Kuvendin. Gjithashtu, sipas analistit edhe LVV nuk i beson LDK-së të udhëheq me Ministrinë e Punëve të Brendshme, siç ka thënë ai, nga frika se do ta ‘sabotojë’, luftën kundër krimit dhe korrupsionit.

“Siç duket, nga gjithë ai bashkëpunim opozitar dhe bashkërendim për programin qeverisës nuk kanë arritur të ndërtojnë mirëbesimin mes partnerëve të ardhshëm qeveritar. Formimi i institucioneve të reja në themelet e mungesës së besimit mund të përkthehet në qeverisje të përbashkët afatshkurtër”, tha ai.

Vela tregoi se çfarë duhet bërë partitë politike për të evituar gjithë këtë situatë.

“Liderët e partive si dhe zyrtarët e përfshirë në harmonizimin e programit qeveritar duhet të jenë në kontakt të drejtpërdrejtë për të shqyrtuar ide dhe alternativa që mundësojnë arritjen e kompromisit. Partitë duhet të heqin dorë pak nga synimet fillestare. Formula që mundëson bashkëpunimin politike duhet të bazohet në kontrollin e ndërsjellë të pushtetit mes partnerëve qeverisës, për të parandaluar koncentrimin e fuqisë politike dhe buxhetore tek njëra parti politike. Kjo mund të arrihet nëse liderët e LVV-së dhe LDK-së gjejnë zgjidhje për bashkëpunim afatgjatë, pasi që edhe pretimet e tyre për luftimin e korrupsionit, rimëkëmbjen e ekonomisë, arsimit dhe shëndetësisë nuk do të mund të arrihen brenda katër viteve”, shpjegoi ai.

Në anën tjetër edhe Jetmir Bakija nga organizata joqeveritare Demokracia Plus, tregoi një opsion se si mund të pajtohen LVV dhe LDK, sa i përket postit të presidentit.

“Më reale dhe më e zbatueshme në këto rrethana do të ishte marrëveshja për disa veti të kandidatit për president, kur vjen koha. Një prej vetive të jetë personalitet i pavarur partiak. Dhe, së dyti, të jetë figure unifikuese që nuk do të ketë kundërshtime të mëdha edhe që disa nga deputetët opozitarë, që së paku të jenë të pranishëm në votim, siç e kërkon vendimi i Gjykatës Kushtetuese (vendimi i cili do të thotë që presidenti zgjidhet nëse në votim janë të pranishëm së paku 80 deputetë)”, ka thënë Bakija për Telegrafin.

Telegrafi ka kontaktuar edhe me Lëvizjen Vetëvendosje dhe Lidhjen Demokratike të Kosovës për të kuptuar se kur do të jetë takimi i ardhshëm mes liderëve, mirëpo këto dy parti nuk kanë dhënë ndonjë përgjigje.

Ndryshe, kanë kaluar 14 ditë që kur Komisioni Qendror i Zgjedhjeve (KQZ) ka certifikuar rezultatin përfundimtar të zgjedhjeve të parakohshme parlamentare të mbajtura më 6 tetor.

Pas certifikimit të rezultatit zgjedhor, është hapur rruga për konstituimin e përbërjes së re të Kuvendit dhe Qeverisë së Kosovës.

Neni 66 i Kushtetutës së Kosovës e parasheh mënyrën e konstituimit të Kuvendit. Aty përcaktohet se Kuvendi zgjidhet me mandat katërvjeçar, duke filluar nga dita e seancës konstituive, që mbahet brenda 30 ditëve nga dita e shpalljes zyrtare të rezultateve të zgjedhjeve.

Në legjislaturën e shtatë LVV do t’i ketë 29 deputetë, kurse LDK 28 deputetë./Telegrafi/