Maqedoni: Punëtorët shëndetësorë punojnë edhe nga 24 orë gjatë periudhës së coronavirusit

Edhe pse disa prej tyre punojnë nga 24 orë, deri më tani Qeveria nuk ka marrë asnjë vendim për ta shpërblyer punën dhe mundin e të punësuarve në shëndetësi, të cilët me vetësakrificën e tyre kanë kontribuuar në drejtim të mbrojtjes së shëndetit të qytetarëve nga coronavirusi. Mjekët konsiderojnë se duhet të ketë bonuse për ata që nga dita e parë e pandemisë janë përfshirë në mënyrë të drejtpërdrejtë në luftën kundër epidemisë Covid-19.

“Pasi që filluam me pajisje minimale mbrojtëse dhe nga xhepi ynë dhamë mjete për ta siguruar mbrojtjen tonë gjatë punës, kërkojmë që në këtë pjesë Ministria të përfshihet dhe të na mundësojë më shumë pajisje mbrojtëse apo kompensim për ato të holla që i kemi dhënë nga xhepi ynë. Bonuse më të larta duhet të marrin të punësuarit në Klinikën Infektive”, tha Marija Filipoviq-Stojanoska ISHP Dr.Roza – Tetovë.

Ministri i Shëndetësisë, Venko Filipçe, sot paralajmëroi se planifikohet një rritje, si shpërblim për punëtorët shëndetësorë dhe se për momentin po shqyrtohen mundësitë buxhetore për këtë.

“Planifikojmë shpërblim me një shumë të caktuar dhe kompensim për të gjithë mjekët dhe infermieret që gjatë periudhës së kaluar kanë punuar me këta pacientë” tha Filipçe.