Manipulimi i llogarive të shteteve nga ndihma e bankave

Disa javë më parë, një delegacion i veçantë u vu re nga publiku ndërsa vizitonte lagjen financiare të Athinës. Bankierë nga “Goldman Sachs” po shoqëronin një skuadër njerëzish të fuqishëm, mes të cilëve qe edhe superinvestitori John Paulson, një menaxher asetesh nga Shtetet e Bashkuara.

Bankat e investimeve të tilla si “Goldman” zakonisht shoqërojnë klientët e vet nga fondet e menaxhimit të aseteve në udhëtimet për mbledhjen e të dhënave statistikore. Por grupi “Paulson” është i veçantë, për shkak se gjatë dy viteve të fundit ka realizuar fitime të stërmëdha, duke vënë bast mbi asetet e vendeve në vështirësi. Për më tepër, për shkak të klimës së tensionuar financiare në Athinë, kjo vizitë solli një valë të gjerë thashethemesh në shumë kryeqytete europiane.

“Shumë njerëz po vrasin mendjen se çfarë po bënin bankierët amerikanë në një kohë të tillë në Athinë”, thotë drejtori i një banke të madhe europiane. Ndërsa kriza e financave publike greke u thellua gjatë javëve të fundit, zyrtarë grekë apo të Bashkimit Europian kanë treguar shenja nervozizmi apo zemëratë të hapur mbi rolin që kanë luajtur bankat perëndimore në krizën greke.