Lajçak: Një diskutim i gjatë dhe i vështirë me Vuçiqin – dhuna duhet shmangur

Emisari i BE-së për dialogun Kosovë-Serbi, Miroslav Lajçak, ka thënë se ka pasur një diskutim të gjatë dhe të vështirë – por të drejtë – me presidentin e Serbisë, Aleksandar Vuçiq.

“Unë llogaris në sjelljen e përgjegjshme të të gjithëve për të treguar përmbajtje për sigurinë dhe stabilitetin. Dhuna duhet shmangur. U pajtuam që të gjitha marrëveshjet e dialogut duhet të zbatohen plotësisht”, ka shkruar Lajçak në Twitter, përcjell Telegrafi.

Long and difficult, but fair discussion with @predsednikrs @avucic last night.

I count on the responsible behavior of all to show restraint for security and stability. Violence must to be avoided.

Agreed that all Dialogue agreements have to be upheld and fully implemented. pic.twitter.com/8wUnW7nR0t

— Miroslav Lajčák (@MiroslavLajcak) November 5, 2022

Deklarata e tij vjen në ditën kur në veri të Kosovës, më 5 nëntor, do të takohen përfaqësuesit serbë në institucionet e Kosovës.

Në të njëjtën ditë në Beograd do të mbahet mbledhja e Qeverisë serbe, për siç është paralajmëruar, situatën në Kosovë.

Në këtë mbledhje do të jetë i pranishëm edhe presidenti serb, Aleksandar Vuçiq, shkruan rel.

Kryetari i Listës Serbe, Goran Rakiq, ka paralajmëruar se në takimin e 5 nëntorit do të sugjerojë që serbët të largohen nga institucionet e Kosovës.

Ky njoftim erdhi pas vendimit të autoriteteve të Kosovës për suspendimin e drejtorit të Policisë së Kosovës për rajonin e veriut, Nenad Gjuriq, i cili ka refuzuar që të zbatojë vendimin për riregjistrimin e makinave që kanë targa të lëshuara nga Serbia.

Qeveria e Kosovës ka nisur më 1 nëntor të zbatojë planin e saj në tri faza për riregjistrimin e makinave me targa të lëshuara nga Serbia. /Telegrafi/