Komisioni i Konkurencës ndalon rritjen e çmimit të bukës në Vlorë

Komisioni i Konkurrencës ka vendosur marrjen e disa masave të përkohshme për ndalimin e marrëveshjes në tregun e prodhimit dhe të tregtimit të bukës në Qytetin e Vlorës pasi është informuar se ka një rritje të menjëhershme dhe thuajse nga të gjithë ofruesit të çmimit të bukës.

Këto masa janë marrë në kuadër të hetimit që po kryen Autoriteti i Konkurrencës, në këtë treg me qëllim ndalimin e shkeljeve të mundshme të ligjit 9121, “Për mbrojtjen e konkurrencës”. Autoriteti i Konkurrencës, në mënyrë të menjëhershme, ka realizuar inspektime në këtë treg, ku u konstatua se rritja e çmimit të bukës në qytetin e Vlorës ka ardhur pas një takimi të 42 prodhuesve dhe tregtuesve të bukës në datë 21.3.2011. Në këtë takim është rënë dakord se që nga data 23.03.2011 çmimi i bukës 900 gr do të jetë 120 lek dhe çmimi i bukës 450 gr. do të jetë 60 lek.

Ky njoftim është afishuar në të gjitha njësitë tregtare dhe prodhuese të bukës dhe çmimi i fiksuar nga inspektimet paraprake rezulton se është zbatuar nga të gjithë pjesëmarrësit në mbledhjen e datës sipas procesverbalit të administruar. Sjellja e këtyre ndërmarrjeve për fiksimin e çmimit të shitjes së bukës në qytetin e Vlorës ka të ngjarë të jetë një shkelje e Ligjit Nr 9121. Kjo shkelje e mundshme sjell një dëm të rëndë për konkurrencën në treg, dhe për konsumatorët.

Komisioni i Konkurrencës kërkoi që pjesëmarrësit në marrëveshjen e ndaluar për rritjen dhe fiksimin e çmimit të bukës në qytetin e Vlorës, t’i japin fund menjëherë sjelljes së bashkërenduar për fiksimin e çmimit të bukës, që masat e përkohshme të zbatohen me marrjen ne dijeni të këtij vendimi për një periudhë kohe deri në përfundim te hetimit, që moszbatimi i vendimit për masa të përkohshme, ndëshkohet me gjobë deri në 10 % të xhiros vjetore për shkelje të rëndë të konkurrencës dhe që në rast të moszbatimit të masave të përkohshme brenda afateve të përcaktuara në vendim, Komisioni i Konkurrencës mund të vendosë gjoba periodike deri në 5 % të xhiros mesatare ditore të vitin financiar para-ardhës, e cila llogaritet nga data e marrjes se këtij vendimi. /Telegrafi/