Kërkesa për komplete vetë-testimi për COVID-19 rritet në Evropë mes rritjes së rasteve me Omicron

Paketat e para të vetë-testimit për COVID-19 kanë mbërritur në raftet e supermarketeve në Francë, pasi vendi regjistroi një rekord prej 208,000 rastesh të reja të mërkurën, më shumë se dyfishi i numrave të regjistruar në ditën e Krishtlindjeve.

Sipas mediave të huaja, përcjell Telegrafi, në një përpjekje për të trajtuar rritjen e variantit shumë ngjitës Omicron, supermarketet franceze tani po ofrojnë teste të shpejta të antigjenit të coronavirusit, të cilat ofrojnë një mjet më shumë për të luftuar COVID-19.

Dhe rreth njëqind komplete u shitën brenda pak orësh.

Si rezultat, lideri i Francës në testet e diagnostikimit të shpejtë, Biosynex, ka punësuar gjithashtu 200 staf të përkohshëm për të përmbushur kërkesën në rritje për to, të nxitura nga numri rekord i rasteve dhe festat e fundvitit.

“Kërkesa është shumë më e lartë sot se në fillim të vitit”, shpjegoi Gaël Levy, drejtor industrial i Biosynex.

Ndërkohë, në Itali, kërkesa e lartë për vetë-teste e kombinuar me problemet e zinxhirit të furnizimit ka rezultuar në një pengesë pasi italianët përjetojnë pritje me orë të tëra për t’u testuar.

Në Romë, disa njerëzve iu desh të prisnin tetë orë, sipas korrespondentes së Euronews, Giorgia Orlandi.

“Në Milano, disa qendra ku kryhen këto teste kanë arritur kufirin maksimal të rezervimeve dhe për këtë arsye shumë njerëz nuk do të mund të testohen. Në disa vende, edhe ushtria është përdorur për të lehtësuar operacionet në lidhje me testet e shpejta”, shtoi ajo. /Telegrafi/