KE investon 14.5 milionë euro në Mitrovicë

Ekspertë të Komisionit Evropian dhe Komunës së Mitrovicës, kanë prezantuar të enjten projektet që parashihet të realizohen me fondin 14.5 milionësh të KE-së. Në këto projekte bën pjesë Qendra multifunksionale, mandej renovimi i palestrës së sportit “Minatori” si dhe Qendra e Biznesit.

Arianit Loxha, përfaqësues i ekspertëve që kanë dizajnuar këto projekte, tha se bëhet fjalë për objekte që do të arrijnë në rreth 70 mijë metra katrorë sipërfaqe. Për renovimin e palestrës “Minatori”, sqaroi se do të ruhet destinimi që ka për aktivitete sportive garuese, por që do të rinovohet në tërësi, duke përfshi të gjithë detajet.

“Qendra e Biznesit, do të jetë një qendër që do të ofroj hapësira të ndryshme biznesi që korrsopondon me rrethanat ekonomike në këtë qytet”, theksoi Loxha.

Lidhur me këto projekte, kryetari i komunës, Avni Kastrati, ka falënderuar drejtuesit e Komisionit Evropian, që kanë mundësuar nisjen e një investimi kaq të rëndësishëm për Mitrovicën. “Jemi dëshmitarë të disa prej projekteve më madhështore që do të ndërtohen në Mitrovicë, e të cilat do të krijojnë kushte më të mira për jetë për qytetarët tanë”, u shpreh Kastrati

Ndërsa, Antonio Garcia Suarez, shef i infrastrukturës në Zyrën e Komisionit Evropian në Kosovë, tha se këto objekte do të krijojnë hapësira shumë komode dhe të përshtatshme për të rinjtë e këtij qyteti. /Telegrafi/