Kapen me kanabis dhe doreza metalike më makinë, arrestohen dy të rinj në Kukës

Dy të rinj janë arrestuar këtë të premte në Kukës, pasi janë kapur ‘mat’ me doza kanabisi dhe doreza metalike në makinë.

Sipas uniformave blu, në pranga kanë rënë shtetasit me iniciale S.D., 22 vjeç dhe A.C., 28 vjeç, të dy banues në Kukës.

“U kapën në flagrancë me lëndë narkotike dhe me armë të ftohta, në automjet, vihen në pranga 2 shtetas.

Sekuestrohen sasi lëndë narkotike e dyshuar kanabisi e ndarë në doza dhe 2 doreza metalike.

Nga kontrollet e vazhdueshme që ushtrohen për evidentimin dhe goditjen e paligjshmërive, me qëllim rritjen e parametrave të sigurisë, shërbimet e Komisariatit të Policisë Kukës, në bashkëpunim me shërbimet e Forcës së Posaçme “Shqiponja” kanë goditur një rast në fushën e narkotikëve dhe një rast në fushën e armëmbajtjes pa leje.

Në qytet, shërbimet e Policisë kanë ndaluar automjetin me drejtues shtetasin A. C. dhe pasagjer shtetasin A. D. Gjatë kontrollit fizik, shtetasit A. D. iu gjetën sasi lëndë e dyshuar narkotike cannabis sativa e ndarë në doza, me qëllim shitjen, ndërsa shtetasit A. C. iu gjetën 2 doreza metalike.

Në përfundim të veprimeve procedurale, u arrestuan në flagrancë shtetasit A. D., 22 vjeç dhe A. C., 28 vjeç, të dy banues në Kukës.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme, për veprën penale “Prodhimi dhe shitja e narkotikëve” dhe “Prodhimi, mbajtja, blerja apo shitja pa leje e armëve të ftohta”.”, thuhet në njoftimin e policisë.