Hoti i uron shërim të shpejtë Kurtit, pas infektimit me coronavirus

Kryeministri i Kosovës, Avdullah Hoti i ka uruar shërim të shpejtë kryetarit të Lëvizjes Vetëvendosje, Albin Kurtit, pas infektimit me coronavirus.

Hoti ka thënë se Kurtit i dëshiron që ta kalojë sa më lehtë gjendjen shëndetësore me COVID-19, transmeton Telegrafi

“Kryetarit të Lëvizjes Vetëvendosje, Albin Kurti, i dëshiroj që ta kaloj sa më lehtë gjendjen shëndetësore me COVID-19. Zotit Kurti dhe të gjithë të prekurve tjerë i uroj që sa më lehtë t’i përballojnë simptomat dhe t’i kthehen angazhimeve të përditshme”, ka thënë Hoti në një postim në profilin e tij në Facebook.

Kreut të LVV-së, i kanë uruar shërim të shpejtë edhe disa deputetë të Kuvendit të Kosovës. Ndërkaq, Kurti sot bëri të ditur se është në vetë-izolim pasi që është infektuar me COVID-19.

“Të nderuar anëtarë të Lëvizjes e qytetarë të Republikës. Parmbrëmë kisha disa simptoma: kokëdhembje të lehtë, pak koll dhe dhembje e skuqje të syve. Dje jam testuar për COVID-19 dhe kam rezultuar pozitiv. Në dy javët në vijim do të qëndroj në vetizolim”, ka shkruar Kurti në Facebook.

Lexo po ashtu Albin Kurti infektohet me coronavirus

Ndryshe, në Kosovë është rritur numri i rasteve me COVID-19, në 24-orët e fundit janë konfirmuar 197 raste të reja, kurse numri i viktimave ka arritur në 669./Telegrafi/