Gjykata e Bukureshtit vendos Andrew Tate në arrest shtëpiak mes akuzave për trafikim dhe pastrim parash

Një gjykatë rumune ka urdhëruar që Andrew Tate të vendoset në arrest shtëpiak, ka njoftuar përfaqësuesi i tij, pasi ai ishte ndër gjashtë personat e ndaluar në një hetim mbi trafikimin e qenieve njerëzore dhe shfrytëzimin seksual.

Ish-kikboksieri profesionist dhe vëllai i tij, Tristan, ishin ndër gjashtë personat e ndaluar të mërkurën për 24 orë, pasi njësia anti-krim e organizuar e Rumanisë, Diicot, kreu katër kontrolle shtëpiake në qarkun Ilfov dhe në komunën e Bukureshtit, shkruan The Guardian.

Diicot kërkoi nga gjykata e Bukureshtit të arrestonte vëllezërit Tate për 30 ditë, por gjyqtari vendosi që Andrew Tate të vendoset në arrest shtëpiak dhe Tristan në kontroll gjyqësor për këtë periudhë, tha të enjten përfaqësuesja e tyre, Mateea Petrescu.

“Vëllezërit Tate përshëndesin vendimin dhe mohojnë fuqishëm të gjitha akuzat e ngritura kundër tyre, duke theksuar se akuzat janë të pabaza dhe të pambështetura nga prova të rëndësishme”, shkroi Petrescu në një deklaratë.

Vëllezërit Tate ishin akuzuar më parë në mesin e vitit 2023, së bashku me dy gra rumune, për trafikim të qenieve njerëzore, përdhunim dhe formimin e një grupi kriminal për të shfrytëzuar seksualisht gratë, akuza që ata i mohuan.

Para ndalimit të tyre të fundit, vëllezërit ishin nën një ndalim udhëtimi, që u lejonte të udhëtonin brenda Rumanisë, por jo ta linin vendin.

Andrew Tate, i cili e përshkruan veten si një mizogjinist, ka fituar miliona fansa në rrjetet sociale duke promovuar një stil jetese ultra-maskulin që kritikët thonë se nënçmon gratë.

Një postim në llogarinë e Tate në X thoshte: “Gjithçka që përpiqen të bëjnë është të dëmtojnë emrin tim me gënjeshtra të plota”, pa specifikuar se kujt i referohej.

Diicot tha në një deklaratë se kishte urdhëruar ndalimin e gjashtë personave për krime duke përfshirë formimin e një grupi kriminal të organizuar, trafikimin e qenieve njerëzore, trafikimin e të miturve, marrëdhënie seksuale me një të mitur dhe pastrim parash.

Ajo tha se kishte kërkuar që tre nga të dyshuarit të mbeteshin në paraburgim, ndërsa një tjetër të vendosej në arrest shtëpiak.

Sipas Diicot, dy nga të akuzuarit përdorën metodën “loverboy”, e cila përfshin bindjen e viktimave që janë në një marrëdhënie romantike, për t’i detyruar 34 viktima të bënin pornografi, e cila më pas u shit online për të ardhura mbi 2.8 milionë dollarë (2.5 milionë euro) dhe 887,000 kripto tokene.

Diicot pretendon se njëri nga të pandehurit detyroi një të mitur 17-vjeçare të xhironte materiale pornografie në Britani dhe Rumani, duke krijuar fitime prej 1.5 milionë dollarësh (1.3 milion euro). Ajo gjithashtu pretendon se i njëjti i pandehur kishte marrëdhënie seksuale të përsëritura me një viktimë 15-vjeçare. /Telegrafi/