Akuzat e Anisës se nuk iu realizua premtimi i bërë në BBVK 3, reagon klinika: Ajo insiston në operim, mjekët kanë konstatuar se nuk ka nevojë

Ish-banorja e Big Brother VIP Kosova 3, Anisa Veveli, ka ngritur shqetësime serioze në lidhje me trajtimin e saj shëndetësor, duke deklaruar se premtimi për ndërhyrjen e nevojshme për shpinën e saj nuk është mbajtur.

Ajo ka paralajmëruar se këtë të premte, në emisionin investigativ “Piranjat”, do të zbulojë detaje të një skandali rreth kësaj çështjeje.

Gjatë qëndrimit të saj në BBVK 3, Anisës iu premtua trajtimi i problemit të saj shëndetësor nga klinika A Medical Plus Solution, por sipas saj, ky premtim nuk është realizuar siç duhet.

Lexo po ashtu "Shfrytëzimi që kanë dashur të bëjnë në kurriz të dhimbjes time" - operimi që iu premtua në BBVK 3 nuk u realizua, Anisa Veseli përfundon në polici?

Megjithatë, paraditen e së premtes, ka ardhur edhe një reagim zyrtar nga kompania në fjalë, përmes avokatit të tyre përfaqësues, Korab Rexhepaj.

Në një deklaratë për Kosova Today, Rexhepaj sqaroi se A” Plus Medical Solution nuk është një klinikë që ofron trajtime kirurgjikale, por një kompani që merret me dërgimin e pacientëve për trajtim jashtë vendit. Ai konfirmoi se Anisa është dërguar për ekzaminime në dy spitale të njohura në Stamboll, Emsey Hospital dhe Lokman Hospital, të cilat diagnostikuan gjendjen e saj dhe konstatuan se ajo nuk ka nevojë për një operacion, por për terapi fizikale dhe rehabilitim”.

“Anisa insiston në operim, por dy spitalet në Stamboll kanë konfirmuar se ajo nuk ka nevojë për një ndërhyrje kirurgjikale, por për terapi fizikale. Klinika ka përmbushur premtimin e saj duke e dërguar për trajtim jashtë vendit, madje në dy spitale të ndryshme, por nuk mund të shkohet kundër vullnetit të mjekëve”, u shpreh avokati Rexhepaj.

Ky zhvillim ka ndezur debat në rrjetet sociale, ku ndjekësit e reality show-t po ndajnë mendime të ndryshme mbi rastin e Anisës dhe përgjigjen e klinikës.

Tani mbetet për t’u parë se çfarë detajesh të tjera do të dalin në dritë në emisionin “Piranjat”, ku Anisa ka premtuar të zbulojë të vërtetën e saj mbi këtë situatë. /Telegrafi/