Dorëhiqet zv.presidenti i Egjiptit

Teksa egjiptianët po votojnë në raundin e dytë të referendumit për projekt/kushtetutën e kontestuar të promovuar nga presidenti Mohamed Mursi, në vend janë regjistruar zhvillime të reja.

Sipas informacioneve të fundit, kanë dhënë dorëheqjen njëri pas tjetrit zëvendëspresidenti Mahmud Mekky dhe guvernatori i Bankës Qëndrore Egjiptiane, Faruq el Hoqda.

Ky i fundit është dorëhequr për shkak të mosmarrëveshjeve me autoritetet e tjera shtetërore mbi vlerësimin e lirës egjiptiane.

Kundërshtarët e presidentit Mursi nuk e pranojnë draftin me argumentin se favorizon islamikët, aktualisht në pushtet dhe tradhton revolucionin e vitit të kaluar që përmbysi Hosni Mubarakun, transmeton TCH.

Mbështetësit e presidentit nga ana tjetër këmbëngulin se kushtetuta do të garantojë demokracinë. Rreth 250.000 forca sigurie janë angazhuar për ruajtjen e rendit dhe qetësisë në rang kombëtar gjatë zhvillimit të referendumit.

Megjithatë, protestuesit kundër kushtetutës dhe islamikët konservatorë qëlluan njëri-tjetrin me gurë sot, duke detyruar qeverinë të përdorte gaz lotsjellës për t’i shpërndarë.

Pavarësisht dhunës, nuk pati raporte për të plagosur. Në raundin e parë pjesëmarrja në votime ishte e ulët, diku tek 30 për qind.

Raporte jozyrtare tregonin se prej atyre që votuan, 56 për qind ishin në favor të draftit. Rezultatet përfundimtare nuk priten përpara ditës së hënë dhe do të bëhen publike pasi të jenë shqyrtuar edhe ankesat. /Telegrafi/