Bien me 6 % dërgesat e emigrantëve

Sipas Bankës së Shqipërisë, gjatë tremujorit të tretë të vitit 2009, këto të ardhura u vlerësuan 188 milionë euro, me një rënie prej 12 milionë euro kundrejt një viti më parë.

Paratë që emigrantët shqiptarë kanë dërguar pranë familjeve të tyre në atdhe kanë pësuar sërish tkurrje, megjithëse ritmet e rënies së tyre nuk janë ato të vërejtura gjatë vitit të kaluar.

Nga të dhënat e fundit të Bankës së Shqipërisë rezulton se gjatë tremujorit të tretë të vitit 2009, dërgesat nga emigrantët arritën vlerën e 188 milionë eurove, duke shënuar një rënie prej 12 milionë euro kundrejt të njëjtës periudhë të një vitit më parë.

“Rreth 188 milionë euro kanë hyrë në formën e dërgesave të emigrantëve. Këto të fundit shënuan një rënie vjetore prej rreth 6 për qind nga vlera prej 200 milionë eurosh e një viti më parë”,- theksohet në “Deklarata për zhvillimet në sektorin e jashtëm të ekonomisë”, publikuar nga Banka Qendrore.

Rënia e dërgesave nga emigrantët ka nisur të ndihet që në fillim të vitit të kaluar, si pasojë e krizës ekonomike botërore, që preku vendet ku ata punonin dhe jetonin.

Për shkak të recensionit global, të parët që u preken nga shkurtimi i vendeve të punës ishin emigrantët dhe kjo ndikoi që ata të sillnin më pak para në atdhe.