Shala, në takimin vjetor të BERZH-it në Zagreb

Ministri i Ekonomisë dhe Financave, Ahmet Shala, sot udhëtoj për në Kroaci, ku do të marrë pjesë në takimin vjetor të 19-të të radhës të Bankës Evropiane për Rindërtim dhe Zhvillim (BERZH), që do të mbahet më 14 dhe 15 Maj në Zagreb. Kjo vizitë është në kuadër të angazhimeve të vazhdueshme të Qeverisë së Republikës së Kosovës për anëtarësim të Republikës së Kosovës në organizatat ndërkombëtare financiare.

Në këtë takim do të marrin pjesë më shumë se 2000 zyrtarë prej të gjitha vendeve të botës, ndërsa tema e takimit do të jetë, “Ndërtimi i Rritjes së Qëndrueshme.” Gjatë këtyre takimeve do të merren disa vendime shumë të rëndësishme nga ana e aksionarëve për strategjinë e Bankës gjatë viteve të ardhshme

Ministri, Ahmet Shala do të takohet me Presidentin e BERZH, Thomas Mirow, si dhe zëvendës presidentin e Bankës Evropiane për Investime (EIB), Dario Scannapieco, e zëvendës presidentin e Korporatës Financiare Ndërkombëtare (IFC), Rashad Kaldany.

Gjithashtu, Ministri Shala do të ketë takime të shumta me stafin menaxherial të BERZH, me ministrat e financave të vendeve pjesëmarrëse në takime, si dhe guvernator që përfaqësojnë 61 shtete, aksionar në këtë Bankë.