Mustafa: Tirana nuk pati vullnet për bashkëpunimin

Aeroporti Ndërkombëtar i Prishtinës ka hyrë në fazën më të rëndësishme të tij që prej formimit, në dhënien me koncesion në fazën më fitimprurëse, për të marrë në këmbim një strukturë më moderne evropiane. Në një intervistë për gazetën “Panorama”, te Tiranes, drejtori menaxhues Agron Mustafa tregon pozitën joshëse për kompanitë e koncesionit dhe gjithashtu shton se parametrat e aeroportit të Prishtinës janë më të mira se ato të aeroportit të Tiranës..

Aeroporti i Kosovës ka hyrë në një moment të rëndësishëm, dhënien e tij me koncesion një operatori të huaj. Çfarë aeroporti gjejnë operatorët që konkurrojnë?

Operatorët që konkurrojnë dhe hyjnë në garë për të fituar tenderin mbi Partneritetin Publiko Privat të Aeroportit Ndërkombëtar të Prishtinës do të gjejnë një Aeroport që funksionon shumë mirë, është i avancuar, me një mori projektesh të investuara dhe realizuara deri më tani në vlerë prej rreth 50 milion eurosh. Do të gjejnë një aeroport më një pistë të re që ka kushtuar 14.5 milionë euro, me sistem të ri të ndriçimit që ka kushtuar mbi 6 milionë euro dhe shumë e shumë investime të tjera që na kanë kushtuar më pak se dy projektet që potencova më lart.

Këtij aeroporti i mungon vetëm një terminal i ri për udhëtarë me standarde moderne, investim i cili u stopua për shkak se bëmë të njohura planet e qeverisë së Kosovës për dhënien e aeroportit me koncesion. Vlen të theksohet se të gjitha investimet në shumën prej 50 milionë eurove që janë realizuar këto dy vitet e fundit janë kryer nga të ardhurat e kompanisë.

Por vlera më e madhe për këdo që e merr me koncesion Aeroportin Ndërkombëtar të Prishtinës është numri i madh i udhëtarëve në raport me aeroportet e rajonit si edhe trendi gjithnjë në rritje si i numrit të udhëtarëve ashtu edhe i fluturimeve.

Mund të theksoj që rritja e numrit të udhëtarëve edhe për këtë vit është mbi 5 për qind, numri i fluturimeve është rritur për 17 për qind, ndërsa norma e fitimit gati është dyfishuar. Këtë vit presim t’i kemi rreth 1.3 milion udhëtarë ndërsa fitimi neto i kompanisë do të jetë mbi 10 milionë euro. Në vitin 2008 kishim një fitim neto prej 7 milionë euro.

Këtë shifër tani e kemi arritur dhe tejkaluar që në muajin gusht. Si shembull të ecurive pozitive mund t’ju marr po ashtu edhe faktin që vetëm këtë muaj me Zvicrën, ku është koncentruar një pjesë e diasporës sonë kanë filluar dy linja të rregullta nga kompani prestigjioze, si “SWSS International” dhe “Air Berlin”.

Gjithashtu koncesionari do të gjejë një Aeroport të certifikuar ndërkombëtarisht nga Autoriteti Islandez i Aviacionit Civil e më vonë edhe nga Autoriteti Kosovar i Aviacionit Civil, certifikim që dëshmon se Aeroporti Ndërkombëtar i Prishtinës përmbush standardet e parapara nga Organizata Ndërkombëtare e Aviacionit Civil (ICAO), standarde të cilat duhet të plotësohen nga një aeroport për të qenë i kualifikuar për fluturime ndërkombëtare.

E megjithatë tarifat me Shqipërinë janë akoma shtrenjtë?

Çështja e tarifave, apo e çmimit të biletave nuk është politikë e aeroporteve. Kjo çështje ka të bëjë direkt me avion-kompanitë që operojnë këtë linjë. Nëse me pyesni se a mund të ndikohet në uljen e këtyre tarifave, unë mendoj se mund të ndikohet deri në një masë, por prapë se prapë mbetet tek avion-kompania të vendosë se a dëshiron t’i zvogëlojë tarifat e biletave apo jo.

Në fillim të vitit 2009, Autoritetet kosovare vendosën të heqin në tërësi taksën aero-portuale në shumë prej 20.53 euro për të gjithë pasagjerët e linjës Prishtinë-Tiranë. Një hap i tillë pritej edhe nga autoritetet shqiptare, por në vend të një veprimi të njëjtë sikurse ne që morëm në Kosovë, autoritetet shqiptare vendosën një taksë të re për kalim kufiri, e cila është ende në fuqi dhe me sa kujtoj është në shumë prej 10 eurosh dhe duhet të mblidhet nga vetë avion-kompania, duke e llogaritur në çmim të biletës, e cila më pastaj duhet ta derdhë atë në buxhetin e shtetit shqiptar.

Po ashtu nuk pati ndonjë lëvizje nga Aeroporti Ndërkombëtar i Tiranës në këtë drejtim. Me fjalë të tjera, mungoi vullneti nga ana shqiptare për ndërmarrjen e hapave në zbritjen e tarifave në mes Shqipërisë dhe Kosovës.

A mund të na thoni diçka për konkurrentët? Duket numër i vogël apo?

Konkurrentët vinë nga disa vende të botës dhe janë kompani të njohura me përvojë të gjatë në menaxhimin e aeroporteve ndërkombëtare. Sa i përket numrit të konkurrentëve se a është i vogël apo jo, unë konsideroj se duke marrë parasysh gjendjen e tërësishme botërore, me theks të veçantë krizën financiare dhe recesionin ekonomik në botë, numri i konkurrentëve në këtë tender nuk është i vogël. Kemi 3 kompani serioze që jane kualifikuar ne garë.

Pak kohë më parë aeroporti i Tiranës u dha me koncesion. Sa keni mësuar nga gabimet e bëra me këtë kontratë, apo së paku nga ato që konsiderohen si gabime?

Procesin e koncesionimit të Aeroportit Ndërkombëtar të Tiranës e përcjellin një numër kritikash. Në veçanti kritika me e zëshme apo që më së shumti është përmendur pas përfundimit të procesit, çka konsiderohet edhe një prej problemeve më të mëdha të vetë procesit, me ndikim edhe për zhvillimin potencial të zonave tjera të Shqipërisë, veçmas atyre turistike, është ekskluziviteti i fluturimeve ndërkombëtare që iu garantua operatorit të TIA.

Gjendja në të cilën gjendej TIA para koncesionimit, ka qenë një gjendje e mjerueshme. Kjo gjendje pa dyshim edhe ka mundur të diktojë disa nga kushtet e kontratës me operatorin privat, çka ne në Kosovë nuk e kemi të njëjtën situatë, Aeroporti Ndërkombëtar i Prishtinës është në një gjendje tërësisht tjetër, apo më mirë të them në një gjendje shumë të mirë dhe stabile. Megjithatë, unë konsideroj që procesi i koncesionimit të Aeroportit Ndërkombëtar të Tiranës, është një tregim suksesi, çka shumë lehtë mund të shihet sot./panorama/