Dacic: Qëllimi serioz për zbatimin e marrëveshjes

Pas arritjes së ujdisë për zbatimin e planit të marrëveshjes për normalizimin e raporteve ndërmjet Kosovës dhe Serbisë, kryeministri serb Ivica Dacic, ka thënë se ky plan vërteton ekzistimin e “qëllimit serioz” për të zbatuar marrëveshjen e nënshkruar më 19 prill në Bruksel ndërmjet dy kryeministrave.

“Plani përbëhet nga pjesa e parë, e kjo është harmonizimi i kornizës ligjore. Do të formohen grupet punuese të dyja palëve, të cilat do të paraqesin propozimin për atë se cilat ligje duhet të ndryshohen. Pjesa e dytë e planit ka të bëjë me vetë bashkësinë (asociacionin) e komunave serbe”, tha Dacic, për mediat serbe, duke shtuar se në këtë drejtim më shumë punë e pret Kosovën.

Sipas tij, në takim është arritur ujdia që të formohet një ekip udhëheqës i katër komunave në veri të Kosovës, i cili do të ketë për detyrë të përgatisë projektstatutin e asociacionit të komunave serbe.

“Ky trup do të ketë për detyrë të propozojë komandantin e Policisë së Kosovës, në përputhje me marrëveshjen për normalizim të marrëdhënieve, si dhe të koordinojë të gjitha aktivitetet e komunave deri në konstituimin e organeve të bashkësisë së komunave serbe”, tha ai.

“Pas kësaj, sipas planit do të caktohet numri i njerëzve që duhet të integrohen në organet policore dhe gjyqësore”, tha Dacic, duke shtuar se është shumë me rëndësi që përbërja e policisë dhe gjyqësisë të reflektojë përbërjen etnike të popullsisë së komunave. /Telegrafi/