Trump thotë se “për shumë elemente” është rënë dakord përpara telefonatës me Putinin

Presidenti i SHBA-së, Donald Trump ka thënë se “për shumë elemente” të një marrëveshjeje paqeje në Ukrainë janë rënë dakord me homologun e tij rus, Vladimir Putin, përpara telefonatës së shumëpritur të tyre.

Trump postoi në Truth Social duke treguar se do të flasë me Putinin të martën në mëngjes.

Ai tha se përderisa ka pasur marrëveshje, “mbetet shumë” për t’u punuar.

“Çdo javë sjell 2,500 vdekje ushtarësh, nga të dyja palët, dhe duhet të përfundojë TANI. Mezi pres telefonatën me presidentin Putin”, shkroi Trump.

Ai më parë u tha gazetarëve se “ne do të shohim nëse mund të punojmë një marrëveshje paqeje, një armëpushim dhe paqe, dhe unë mendoj se do të jemi në gjendje ta bëjmë atë”.

Ndërkohë në fjalimin e tij të natës të hënën, presidenti ukrainas Volodymyr Zelensky akuzoi Putinin për zgjatjen e luftës.

“Ky propozim mund të ishte zbatuar shumë kohë më parë”, tha ai, duke shtuar se “çdo ditë në kohë lufte do të thotë jetë njerëzore”.

Sipas mediave të huaja, ka pasur mospërputhje nga brenda administratës Trump se sa të avancuara janë bisedimet e armëpushimit.

Duke folur pas takimit të tij në Jeddah me zyrtarët ukrainas, Sekretari amerikan i Shtetit, Marco Rubio tha se “pjesa më e madhe” e bisedës ishte “si do të dukej një proces negociator” dhe jo “kushtet specifike”.

I dërguari i SHBA-së, Steve Witkoff, i cili u takua me Putin të enjten në Moskë, gjithashtu ka pasur një ton më të matur.

E Britania e Madhe dhe Franca i kanë kërkuar Putinit të provojë se dëshiron një marrëveshje paqeje me Ukrainën.

Presidenti francez Emmanuel Macron përshëndeti “guximin” e Zelenksy-t për të rënë dakord për një propozim armëpushimi dhe sfidoi Rusinë të bënte të njëjtën gjë.

“Mjaft vdekje. Mjaft jetë të shkatërruara. Mjaft shkatërrim. Armët duhet të heshtin”, tha Macron në një postim në X.

Ndërsa Sekretari i Jashtëm i Mbretërisë së Bashkuar, David Lammy theksoi se Putini duhet të pajtohet me një “armëpushim të plotë dhe të pakushtëzuar tani”, duke u thënë deputetëve se nuk kishte parë “asnjë shenjë” se Putini ishte serioz për një marrëveshje paqeje.

Ai paralajmëroi se Mbretëria e Bashkuar dhe aleatët e saj kanë “më shumë letra që ne mund të luajnë” për të ndihmuar në detyrimin e Rusisë që të negociojë “seriozisht”. /Telegrafi/