“E kam parë penalltinë mbi 100 herë”, Shearer e cilëson absurditet prekjen e dyfishtë të Alvarez

Legjenda angleze, Alan Shearer u zemërua nga situata që përfshin penalltinë e Julian Alvarez në ndeshjen e 1/8-tës ndaj Real Madridit në Ligën e Kampionëve.

Real Madridi kaloi Atletico Madridin në fazën e 1/8-tës së Ligës së Kampionëve, duke fituar 4-2 në penallti, në një ndeshje që pati shumë polemika.

Gjatë gjuajtjes së penalltive, sulmuesi i Atleticos, Julian Alvarez rrëshqiti para goditjes së tij dhe preku topin me të dyja këmbët.

Lexo po ashtu Atletico Madridi lëshoi ​​një deklaratë të ashpër, dënon vendimin e VAR-it për penalltinë e Alvarezit

Edhe pse arriti të shënonte, arbitri Szymon Marciniak, pasi u konsultua me VAR-in, e anuloi golin duke e cilësuar si të pavlefshëm.

Ky rast ka bërë gjithë botën të flasë tash e disa ditë dhe i fundit që i është bashkuar kësaj ‘valle’ është legjenda angleze, Shearer.

Lexo po ashtu Penalltia e Alvarezit dhe rregulla të tjera kurioze të futbollit: A lejohet të ngjitesh në traversë apo të shënon me top të shpërthyer?

“Unë e kam parë penalltinë e Alvarezit mbi 100 herë dhe ende po përpiqem të gjej prova të pakundërshtueshme që ai preku topin dy herë”, ka thënë fillimisht ish-sulmuesi i Anglisë.

“Është absurditet i plotë që një moment i tillë mund të vendosë rezultatin e një ndeshjeje të këtyre përmasave”, përfundoi Shearer. /Telegrafi/