A po vijnë subvencionet për veturat elektrike në BE?

Bashkimi Evropian planifikon të prezantojë subvencione të reja për blerjen e veturave elektrike në të gjitha vendet anëtare.

Kancelari gjerman Olaf Scholz konfirmoi propozimin gjatë një fjalimi në Forumin Ekonomik Botëror në Davos, Zvicër. Në shumë vende të BE-së, subvencionet kombëtare për automjetet elektrike janë hequr, gjë që ka sjellë një rënie të shitjeve. Tani duket se Bashkimi Evropian do ta ndryshojë këtë prirje me përpjekje të përbashkëta evropiane.

“Më vjen mirë që presidenti i Komisionit pranoi propozimin tim për mbështetje të harmonizuar për makinat elektrike në të gjithë Evropën”, tha Scholz, sipas Bloomberg.

Propozimi përfshin të ashtuquajturat bonus blerjeje për të gjithë ata që blejnë një veturë elektrike në një nga vendet e BE-së. Kështu BE-ja po shkon në drejtim të kundërt me Shtetet e Bashkuara të Amerikës, ku janë hequr subvencionet për automjetet elektrike.

Për industrinë gjermane të automobilave, e cila aktualisht është nën presion të madh, do të ishte një ndihmë e madhe.

“Lëvizshmëria elektrike është e ardhmja, nuk ka dyshim për këtë. Kushdo që sugjeron ndryshe po dëmton industrinë tonë”, tha Scholz.

Presidentja e Komisionit Evropian, Ursula von der Leyen, theksoi rëndësinë e respektimit të qëllimeve ambicioze të klimës në industrinë e automjeteve. /Telegrafi/