Musk ‘përplaset’ me Trumpin rreth veturave elektrike

Elon Musk, CEO i Tesla, ka deklaruar se presidenti amerikan, Donald Trump, nuk do të mund të ndalojë rritjen e automjeteve elektrike, pasi ai beson se suksesi i kësaj teknologjie është “i pashmangshëm”.

Miliarderi e krahasoi të ardhmen e veturave me djegie të brendshme me rënien e përdorimit të kuajve në transport. Ai shtoi se problemi kryesor që kishte penguar zhvillimin e automjeteve elektrike, autonomia e baterisë, tani është zgjidhur.

Në përgjigje të një pyetjeje për planet e Trumpit për të ndryshuar politikat e Joe Bidenit për automobilat elektrik, Musk tha se “transporti i gjelbër është i pashmangshëm. Jam i sigurt se të gjithë transporti do të bëhet autonom dhe elektrik, përfshirë aeroplanët”.

Ai shtoi se pavarësisht përpjekjeve, automjetet elektrike do të jenë të pamundura për t’u ndaluar, ashtu siç nuk mund të ishte ndaluar shpikja e motorëve me avull ose me djegie të brendshme, shkruan thetelegraph.

Mbështetja e Muskut për Trumpin është vënë në dyshim pas shqetësimeve se qëndrimi i presidentit të ri kundër subvencioneve për automjetet elektrike mund të ndikonte negativisht në shitjet e Teslas.

Trump kishte nënshkruar një urdhër ekzekutiv që anulonte objektivin e Bidenit për të pasur 50 për qind të automjeteve të shitura deri në vitin 2030 që të ishin elektrike. Ai gjithashtu kishte kërkuar të ndaloheshin subvencionet për automjetet elektrike, ndonëse kjo mund të kërkonte ndryshime në ligj.

Pavarësisht kësaj, Musk ka thënë se Tesla është në një pozicion më të fortë për të përballuar mungesën e subvencioneve, pasi kompania e tij ka investuar më shumë në teknologjinë elektrike dhe është më e fortë financiarisht se konkurrentët. Musk gjithashtu theksoi se avantazhi kryesor i Tesla-s nuk është vetëm teknologjia elektrike, por edhe automjetet vetë-drejtuese dhe robotët autonomë. Ai parashikoi që Tesla do të bëhet më e vlefshme se pesë kompani të tjera të mëdha të kombinuara për shkak të këtyre teknologjive.

Në vitin 2024, shitjet e Tesla-s pësuan një rënie të vogël pas ngadalësimit të bumit të automjeteve elektrike. Shitjet e automjeteve elektrike në SHBA u rritën vetëm 7.3 për qind vitin e kaluar, dhe përfaqësuan 8.1 për qind të tregut, një rritje minimale krahasuar me 7.8 për qind që ishte në vitin 2023. /Telegrafi/