Inflacioni në Kosovë, Bajrami: Realiteti nuk mund të fshihet me një tabelë, pas 9 shkurtit disa do të shkojnë në shtëpi e disa drejtësia do t’i dërgojë në Dubravë 

Deputetja e Lidhjes Demokratike të Kosovës, Hykmete Bajrami ka reaguar lidhur me inflacionin në vend, duke thënë se realitetin e inflacionit, të korrupsionit dhe të izolimit të Kosovës që po zgjatë që katër vite Qeveria nuk mund ta fsheh me një tabelë as me një fotografi.

Bajrami në një postim në Facebook shkruan se prej 2021 deri me sot çmimi i miellit është rritë me 52%, çmimi i bukës me 48%, çmimi i qumështit me 37%, çmimi i sheqerit me 78%, e drutë e zjarrit me 54%.

“Kudo që shkoj, në secilin fshat e qytet, në secilën familje diskutimi kryesor është se partia në pushtet mashtroi, gënjeu dhe nuk mbajti asnjë premtim. I varfëroi dhe tash me gënjeshtra po tentojnë të vazhdojnë krimin, korrupsionin dhe biznesin me Nagip Krasniqin e Martin Berishajn.

Gjatë takimeve me qytetarë në Obiliq, Kaçanik, Viti, Han i Elezit, Ferizaj dhe qytetet e tjera, kanë shprehur zhgënjimin për dyfishimin e çmimit të rrymës ndërkohë ndihen të mashtruar sepse premtimet ishin do të zvogëlohet çmimi.

Sikurse në secilin qytetet, edhe në Mitrovicën e minatorëve, ashtu edhe në Obiliq e Fushë Kosovë, konstatimi ishte i njëjtë: Qeveri e mashtruesve dhe praktikantëve”, shkruan deputetja e LDK-së.

Ajo tutje thotë se po ashtu ka takuar qytetarë në Podujevë e Gjilan, e të cilët kanë përmendur stërzgjatjen e punimeve nëpër rrugë e po ashtu kanë përmendur urën e Badovcit që ende nuk u përfundua.

“Sikurse banorët e qyteteve tjera, edhe llapjanët dhe gjilanasit e kanë kuptuar gënjeshtrën dhe mashtrimin e praktikantëve dhe kontabilistëve të Qeverisë së gënjeshtrave.

Kam takuar të rinj e të reja që përballen me çmime të larta të kopshteve dhe me mungesë të banimit. Njëjtë: Të gjitha ndihen të mashtruar nga kontabilistët praktikantë të partisë në pushtet që kurrë nuk i ndërtuan 160 çerdhet dhe as 4 mijë banesat e premtuara”, shkruan Bajrami.

“Rrëfimi nuk përfundon këtu. Praktikantët kanë mashtruar secilën kategori të shoqërisë. Madje, edhe të moshuarit, duke gënjyer se do t’i ndërtojnë pesë shtëpi për ta.

Mashtrimit po i vjen fundi sikurse edhe nëntokës së partisë në pushtet.

Më 9 shkurt, qytetarët pa asnjë dyshim do t’i thonë STOP hajnive me tenderë njëburimor që kanë kapur shifrën e 273 milionë euro.

Më 9 shkurt, qytetarët do t’i çojnë në shtëpi mashtruesit që s’ia kanë sjellë asnjë njohje Kosovës. Që e kanë dërguar Kosovën në sanksione, që kanë hyrë thellë në korrupsion me Nagip Krasniqin, Martin Berishajn dhe nëntokën e Vetëvendosjes. Do të kemi shumë punë pas 9 shkurtit sepse mashtruesit, gënjeshtarët, kontabilistët, shpifësit do të shkojnë në shtëpi e disa drejtësia do t’i dërgoj në Dubravë”, thotë ajo. /Telegrafi/