Kinezi nxori 23 dhëmbë dhe bëri 12 implante në të njëjtën ditë – vdes disa ditë më vonë

Autoritetet kineze po hetojnë rastin e një të moshuari, i cili vdiq 13 ditë pasi kishte nxjerrë 23 dhëmbë dhe kishte futur 12 implante në të njëjtën ditë në një klinikë dentare.

Shu, banore e qytetit Yongkang, në provincën Zhejiang të Kinës, së fundmi paraqiti një ankesë në Byronë Komunale të Shëndetit kundër një klinike dentare lokale pas vdekjes së babait të saj. Gruaja paraqiti prova se prindi i saj i kishte nxjerrë 23 dhëmbë dhe i kishte implantuar 12 dhëmbë të rinj në një seancë të vetme, gjë që ajo pretendon se shkaktoi vdekjen e parakohshme 13 ditë më vonë.

Ajo u tha autoriteteve se babai i saj vuante dhimbje torturuese gjatë 13 ditëve të fundit të jetës së tij, përpara se të pësonte një atak fatal në zemër më 28 gusht. Tani gruaja kërkon që përgjegjësit të dalin para drejtësisë, shkruan odditycentral.

Sipas formularit të pëlqimit të pacientit, babai Shu-s në fakt nxori 23 nga dhëmbët e tij natyralë përpara se t’i hapeshin 12 vrima në kafkën dhe në mandibulën për të vendosur dhëmbë të rinj.

E gjithë kjo u bë në një ditë të vetme, që do të thoshte se ai duhej të duronte dhimbje të paimagjinueshme pasi anestezia mbaroi. Edhe pse numri i nxjerrjeve duket paksa i tepruar për një seancë të vetme, një zëdhënës i klinikës ku është kryer procedura tha se numri i dhëmbëve që mund të hiqen në të njëjtën kohë duhet të përcaktohet nga mjeku personalisht.

Sipas të dhënave të Spitalit Dental Dewei, 23 nxjerrjet u kryen nga një mjek i quajtur Yuan, specialitetet e të cilit përfshijnë trajtimin e kanalit të rrënjës, heqjen e dhëmbëve dhe protezat e plota. Megjithëse aktualisht nuk ka një rregullore specifike për numrin e dhëmbëve që duhen nxjerrë në një seancë të vetme, klinika dhe mjeku duhet të marrin parasysh tolerancën ndaj dhimbjes së pacientit dhe rrezikun e infeksionit.

Një hetim për këtë rast është duke u zhvilluar, por një përfaqësues i Byrosë Komunale të Shëndetësisë u tha gazetarëve se vërtetimi i shkakësisë mund të jetë i vështirë, duke pasur parasysh se vdekja e burrit ka ndodhur 13 ditë pas procedurës së diskutueshme. /Telegrafi/