Shefi gjerman i mbrojtjes paralajmëron se Rusia “po e orienton ushtrinë e saj drejt Perëndimit”

Shefi i mbrojtjes së Gjermanisë, Carsten Breuer, ka thënë se sheh një rrezik në rritje në ngritjen ushtarake të Rusisë.

“Ne po vëzhgojmë se ushtria ruse po orientohet drejt Perëndimit”, tha Breuer, zyrtarisht inspektori i përgjithshëm i Bundeswehr-it, për gazetën lokale Sächsische Zeitung, shkruajnë mediat e huaja, përcjell Telegrafi.

Ai tha se në pesë deri në tetë vjet, forcat e Moskës do të pajisen me materiale dhe personel të mjaftueshëm në mënyrë që një sulm në territorin e NATO-s të ishte i mundur.

Ai përmendi analizat e tij, raportet e inteligjencës dhe deklaratat e forcave aleate, si dhe deklaratat e presidentit rus Vladimir Putin, si bazë për këto vlerësime.

“Ushtria ruse rrit numrin e tankeve të saj me 1000 deri në 1500 njësi shtesë çdo vit. Pesë vendet më të mëdha evropiane anëtare të NATO-s së bashku kanë vetëm gjysmën e tyre në inventarin e tyre”, citohet të ketë thënë Breuer.

Bundeswehr, siç njihen forcat e armatosura të Gjermanisë, ka rreth 300 tanke luftarake.

“Nëse kjo aftësi kombinohet me qëllimin, që sigurisht mund të konkludohet nga fjalimet e Putinit, kjo duhet të na alarmojë. Detyra ime është të shqyrtoj një skenar të tillë të rastit më të keq. Për Bundeswehr-in, kjo do të thotë: Ne duhet të jemi të përgatitur për këtë”.

Megjithatë, ai tha se situata e re e kërcënimit ende nuk është njohur plotësisht kudo. /Telegrafi/