Të rinjtë e Drenasit aktivë, nga Këshilli i Veprimit Rinorë thonë se janë të hapur edhe për vullnetarë

Këshillit të Veprimit Rinor Lokal (KVRL), në Drenas ka më shumë se dhjetë vite që funksionon si organizatë jo politike e të rinjve.

Përmes projekteve të ndryshme ata kanë bërë punë të shumta në sfera të ndryshme si edukimi, kultura e sporti, në komunën e Drenasit, transmeton Telegrafi.

Donika Zogu e cila është tashmë pesë vite kryetare e Këshillit të Veprimit Rinor Lokal (KVRL) thotë se vetëm vitet e fundit kanë realizuar 20 projekte.

“Vitet e fundit kemi realizuar mbi 20 projekte të ndryshme, që përfshijnë fusha të ndryshme si edukimi, kultura, sporti dhe zhvillimi i kapaciteteve rinore”, tha ajo.

Sipas kryetares së KVRL-së sfida kryesore ishte te financat e qëndrueshme, pasi që sipas saj kanë pasur probleme financiare dhe kjo ka penguar funksionimin e organizatës.

“Vështirësitë kryesore kanë përfshirë gjetjen e financimeve të qëndrueshme, angazhimin e të rinjve në aktivitete të vazhdueshme. Për më tepër, para dy viteve të fundit nuk kemi pasur financim nga Komuna, pavarësisht se KVRL është një ombrellë e organizatave të tjera dhe duhet të mbështesë këto organizata. Fatkeqësisht, si funksionon në Kosovë është që KVRL duhet të aplikojë për subvencione, duke u bërë konkurrencë vetë OJQ-ve nën ombrellën e saj për shkak të mungesës së qëndrueshmërisë financiare për funksionim. Në raste të tilla kur KVRL-të nuk kanë një mbështetje nga Komunat ato rrezikojnë të shuhen sikur në shumë komuna të tjera në Kosovë”, u shpreh ajo.

Veç kësaj, ajo tha se mbështetja nga komuna nuk ka munguar.

“Kemi pasur mbështetjen e komunës së Drenasit në disa projekte kyçe. Megjithatë, gjithmonë ka vend për përmirësim në rritjen e mbështetjes financiare dhe bashkëpunimit strategjik”, tha ajo.

Ajo rrëfeu për Telegrafin, një nga projektet që për të është krenari dhe që sipas saj ka ndihmuar shumë në zhvillimin e komunikimit mes të rinjve.

“Një nga projektet me të cilat ndjehem shumë krenare është ‘Be Free to Just Be’, i cili ka pasur një ndikim të madh në promovimin e bashkëjetesës paqësore dhe mirëkuptimit ndërmjet të rinjve nga komunitete të ndryshme. Ky projekt ka ndihmuar në ndërtimin e urave të komunikimit dhe bashkëpunimit që janë thelbësore për zhvillimin e një shoqërie më të bashkuar”, u shpreh ajo.

Planet e KVRL-së janë të shumta, e një ndër to edhe zgjerimi i organizatës duke e qenë e hapur gjithnjë për njerëz të rinj.

“KVRL është shumë e hapur për vullnetarë të rinj. Ne gjithmonë kërkojmë të rinj të motivuar dhe të angazhuar që dëshirojnë të kontribuojnë në komunitet dhe të zhvillojnë aftësitë e tyre personale dhe profesionale. Planet tona për të ardhmen përfshijnë zgjerimin e rrjetit të vullnetarëve, zhvillimin e projekteve të reja që adresojnë sfidat aktuale të të rinjve dhe forcimin e bashkëpunimit me institucione dhe organizata të tjera për të siguruar mbështetje dhe për të krijuar mundësi të reja për të rinjtë në komunitetin tonë”, tha ajo.

Ndryshe, Këshilli i Veprimit Rinor Lokal (KVRL), është formacion këshillues i organizatave rinore, grupeve rinore joformale, të cilat veprojnë në nivelin lokal dhe përfaqësojnë interesat e organizatave rinore dhe të rinjve në përgjithësi, tek institucionet e pushtetit lokal dhe qendror. /Telegrafi/