Jetë të humbura dhe paralajmërime për të qëndruar brenda – këto janë vendet më të prekura nga vala e të nxehtit që ka goditur disa pjesë të Evropës

Temperaturat deri në 44°C, alarme “rrezik për jetën”, thatësira dhe zjarre – është një verë “djallëzore” që ka goditur pjesë të Evropës qendrore dhe jugore.

Kështu raportojnë mediat e huaja, sipas të cilave, dy zjarrfikës kanë humbur jetën gjatë shuarjes së zjarrit në rajonin e Bazilikatës në jug të Italisë, ndërsa vdekje të lidhura me nxehtësinë janë raportuar në të gjithë Ballkanin.

Moti apokaliptik – me origjinë nga një valë ajri e nxehtë nga shkretëtira e Saharasë – po godet Evropën dhe meteorologët po paralajmërojnë se valët e zgjatura të të nxehtit do të bëhen më të zakonshme, përcjell Telegrafi.

Madje, njerëzve u është thënë të qëndrojnë brenda për t’i shpëtuar temperaturave të larta në qytete në të gjithë Turqinë, Greqinë dhe Italinë.

Dhe gjendja duket se do të përkeqësohet.

Kjo është gjithçka që dihet për motin ekstrem të Evropës.

Italia

Pasi u godit nga një valë e fuqishme e të nxehtit, më e keqja nuk ka ardhur ende për Italinë, shkruajnë mediat e huaja, përcjell Telegrafi dhe në fund të kësaj jave priten temperatura deri në 45 gradë Celsius.

Ndërsa një valë ajri e nxehtë nga Afrika përfshiu Evropën të martën, këto qytete u vendosën nën paralajmërimin më të ashpër të nxehtësisë: Ankona, Bolonja, Campobasso, Firence, Frosinone, Latina, Perugia, Pescara, Rieti, Roma, Trieste dhe Viterbo.

Ndërkohë në listë është shtuar edhe Palermo, kryeqyteti i Sicilisë.

Më në veri, të moshuarve në qytetin e Veronës iu kërkua të qëndronin brenda, ndërsa spërkatës u vendosën për të freskuar kalimtarët.

Të paktën katër persona kanë vdekur tashmë nga efektet e nxehtësisë në Bari, Pulia dhe Romë mes lagështirës së madhe.

Qytetet duke përfshirë kryeqytetin italian dhe destinacionet e njohura turistike si Napoli dhe Firence pritet të goditen rëndë.

Greqia

Greqia po përballet me rrezikun e saj më të rëndë nga zjarri në dy dekada, me disa rezervuarë që arrijnë nivelet e tyre më të ulët në 10 vjet.

Të gjitha shërbimet zjarrfikëse janë aktualisht në gatishmëri të lartë për shkak të incidenteve të shumta në mbarë vendin dhe kushteve atmosferike mbizotëruese, përcjell Telegrafi.

Prej pasdites të së mërkurës, një zjarr ka shpërthyer në zonën pyjore të Agios Vlassis pranë Sofikos, Korinth, duke avancuar drejt Epidaurus.

Flakët po djegin një pyll të dendur me pisha dhe janë përhapur me shpejtësi të madhe.

Të paktën tre zjarrfikës pësuan djegie të lehta dhe u shtruan në spital në Korinth.

Kea, ishulli më perëndimor grek i Cyclades, është shkatërruar gjithashtu nga zjarret në tre ditët e fundit.

Pamjet tregojnë helikopterët që mbledhin ujë nga deti Egje dhe e hedhin atë në zona të bimësisë së thatë në zjarr të martën.

#Μεγάλη #ΠΥΡΚΑΓΙΑ στο Σοφικό #Κορινθίας pic.twitter.com/xEilumTPpF

— Forecast Weather Greece (@ForecastGreece) July 17, 2024

Paralajmërimet janë lëshuar për rajonin përreth Athinës, me një paralajmërim të ngjashëm për verilindjen e vendit.

Akropoli – atraksioni më i madh kulturor në Greqi – u detyrua të mbyllej nga mesdita e së mërkurës për pesë orë.

Turqia

Në Turqinë perëndimore, zjarrfikësit të ndihmuar nga më shumë se një duzinë aeroplanësh që hedhin ujë – arritën të vënë nën kontroll një zjarr në afërsi të qytetit Bergama disa orë pasi ai u ndez të mërkurën.

Kjo vjen pasi trupat e djegur të tre personave – një fëmije, një gruaje dhe një burri – u gjetën në një pyll të djegur në provincën perëndimore të rrethit Çeşme të Izmirit.

Flakët u përhapën me shpejtësi për shkak të erërave të forta dhe shumë shtëpi u evakuuan.

Dhe edhe me temperaturat që lëvizin në 34°C më të përballueshme, bashkia e Stambollit lëshoi një paralajmërim për ngrohjen të martën, duke këshilluar banorët – veçanërisht të moshuarit, fëmijët dhe gratë shtatzëna – të qëndrojnë brenda mes orës 10:00 dhe 16:00.

Këshilla është në fuqi deri më 28 korrik, ndërsa vapa mbetet mbi normat sezonale.

Bullgaria

Mbi 270 zjarre janë shuar në 24 orët e fundit në Bullgari, por flakët vazhdojnë të përhapen.

Fshatra të tëra dhe pjesë të qyteteve janë evakuuar. Dhjetëra shtëpi u dogjën në fshatin Voden, ku njerëzit u detyruan të largohen për të shpëtuar pasi autoritetet i lajmëruan shumë vonë për rrezikun.

Fshatarët e dëshpëruar u përpoqën të shpëtonin çfarë të mundnin, duke rrëmbyer kafshët e fermës dhe dokumentet dhe duke ikur.

Gjendja e jashtëzakonshme është shpallur në provincën Stara Zagora, në Bullgarinë jug-qendrore.

Zjarret vazhdojnë edhe në rajonin e Burgasit, një destinacion popullor pushimesh për turistët britanikë.

Mijëra hektarë janë djegur gjatë fundjavës, duke prekur kryesisht fshatrat malore.

Meteorologët thanë se temperaturat ishin edhe më të larta se sa raportohet zyrtarisht në qytetet e mëdha ku betoni rrezaton nxehtësi mbi tokë. /Telegrafi/