Ilir Daja, trajneri që vendosi dominim në futbollin kosovar

Trajneri nga Shqipëria, Ilir Daja ka vendosur dominim në futbollin kosovar pas sukseseve të njëpasnjëshme me skuadrën nga Suhareka, Ballkani, ku ka fituar çdo trofe të mundshëm që nga emërimi i tij.

Ilir Daja erdhi si një emër i njohur nga Shqipëria, por pa shumë bujë në fillimin e janarit 2022, duke zëvendësuar Bekim Isufin në stolin e Ballkanit.

Trajneri nga Shqipëria mori klubin therandas në pozitën e tretë në gjysmë të sezonit 2021/22, por bëri mrekulli qysh në sezonin e parë.

Në fund të sezonit, Daja arriti t’ia sjell Ballkanit trofeun e parë në histori, duke u shpall kampion në Superligën e Kosovës.

Por, ky ishte vetëm fillimi i dominimit të trajnerit 57-vjeçar në futbollin kosovar.

6 trofe në 2 vite e gjysmë

Kupa e Kosovës ishte trofeu i vetëm që i mungonte Dajës dhe Ballkanit që nga ‘martesa’ e tyre në dimrin e 2022-të.

Këtë trofe e arritën të mërkurën pasdite pasi mposhten Prishtinën pas penalltive (4-2), ku ndeshja e rregullt dhe vazhdimet u mbyllen baras 2-2.

Me trofeun e Kupës së Kosovës, Daja shkon në kuotën e gjashtë trofeve në vetëm dy vite e gjysmë.

Pasi ka fituar titullin e Kosovës këtë sezon 2023/24 dhe Kupën e Kosovës, atëherë i takon automatikisht edhe trofeu i Superkupës së Kosovës.

Daja ka fituar titullin edhe në sezoni e kaluar 2022/23, si dhe Superkupën e Kosovës në vitin 2023.

I vetmi në Kosovë

Trajneri tiranas është i vetmi në Kosovës që ka arritur kaq shumë trofe brenda një kohë kaq të shkurt.

Ka emra tjerë trajnerësh të njohur si Afrim Tovërlani, Zekirija Ramadani, Genc Hoxha dhe Ajet Shosholli, por asnjeri nuk ka arritur gjashtë trofe në dy vite e gjysmë.

Shkruan emrin në histori

Daja është bërë trajneri i parë në histori që arrin të fitojë trofe tituj të Superligës së Kosovës radhazi.

Nga dy herë radhazi e kanë fituar Genc Hoxha me Besën e Pejës (2002/06, 2006/07) dhe Afrim Tovërlani me Prishtinën (2007/08, 2008/09).

Tiranasi gjithashtu ndan pozitën e dytë se bashku me Zekirija Ramadanin me nga tre tituj të fituar dhe vetëm Tovërlani është para tyre me katër tituj.

Suksesi në Ligën e Konferencës

Trajneri 57-vjeçar është i vetmi trajner që ka arritur ta kualifikojë një klub të Kosovës në garat evropiane.

Daja këtë e ka arritur në dy sezone, duke e kualifikuar Ballkanin në grupet e Ligës së Konferencës.

Hera e parë ishte në edicionin 2022/23, ku përfundoi i katërti me katër pikë, ashtu sikurse edhe në edicionin 2023/24 që përfundoi në pozitën e njëjtë me po aq pikë.

/Telegrafi/