Nëntë fakte interesante rreth Ramazanit në Turqi

Muaji i shenjtë i Ramazanit është një nga periudhat më të mrekullueshme të vitit për të vizituar Turqinë. Nga atmosfera te aktet e shtuara të bamirësisë dhe përqendrimi te vlerat, ky muaj do të ofrojë edhe njohuri për kulturën turke.

Ramazani në Turqi, si në shumë vende të tjera me shumicë myslimane, është një kohë e rëndësishme dhe e veçantë.

Për 30 ditë, shumë do të nisin një agjërim të ditës nga lindja e diellit deri në perëndim të diellit në atë që është agjërimi më i madh kolektiv në botë.

Kjo është një kohë e shenjtë për myslimanët, dhe agjërimi konsiderohet gjithashtu si një lloj ripërtëritjeje shpirtërore.

Lexo po ashtu Muaji i Ramazanit - një "koleksion" urimesh për muajin e agjërimit, në gjuhë të ndryshme të botës

Por pavarësisht nëse praktikoni agjërimin apo jo, ka disa fakte interesante për t’u ditur gjatë këtij muaji më të shenjtë dhe veçanërisht nëse ndodheni në Turqi, shkruajnë mediat e huaja, përcjell Telegrafi.

Të shtëna topash për iftar

Në disa vende në Turqi, një top “lëshohet” tradicionalisht për të sinjalizuar fillimin e iftarit, i cili është vakti i agjërimit që bëhet pas perëndimit të diellit.

Në Stamboll për shembull, një top mund të hidhet në Sulltanahmet në një ceremoni tradicionale.

Lexo po ashtu Ramazani 2024: Orët e agjërimit në mbarë botën

Zhurma mund të jetë mjaft tronditëse për ata që nuk janë në dijeni të kësaj tradite dhe prandaj paralajmërohen njerëzit se mund të dëgjojnë një shpërthim të madh afër perëndimit të diellit.

Daullexhinjtë e Ramazanit

Në disa qytete dhe qyteza turke, tradita përfshin praninë e daullexhinjve të Ramazanit.

Këta daullexhinj, të njohur si “sahur davulcuları”, bredhin rrugëve para agimit, duke rrahur daullet për të zgjuar njerëzit për syfyr, vaktin para agimit.

Kjo mund të jetë gjithashtu një surprizë për ata që nuk e njohin këtë traditë, veçanërisht në fund të muajit të agjërimit kur ata mund të shkojnë derë më derë për të marrë një bakshish për shërbimet e tyre.

“Pide” e freskët

Gjatë muajit të shenjtë të Ramazanit, nga furrat e bukës përgatitet një bukë e veçantë e sheshtë e quajtur “Ramazan pidesi”.

Një gjë e preferuar për shumicën e turqve, në orët e vona të pasdites, kur pideja e fryrë dhe e madhe e rrumbullakët është e freskët nga furra, mund të krijohen rreshta para furrave të bukës vetëm për njerëzit që duan të blejnë këtë pide, e cila është një artikull integral nëse jo i detyrueshëm në çdo tavolinë të shtruar gjatë Ramazanit.

Pjata speciale

Gatimet tradicionale turke janë në qendër të vëmendjes gjatë Ramazanit.

Produktet e veçanta të iftarit shpesh përfshijnë hurma, ullinj, supë dhe pide që shoqërojnë një pjatë me perime ose me bazë mishi.

Ëmbëlsirat tradicionale si bakllavaja janë gjithashtu të njohura gjatë kësaj kohe.

Lexo po ashtu Tradita e Ramazanit: 3,350 tupanë do të zgjojnë banorët e Stambollit për syfyr

Supermarketet do të kenë kutitë e Ramazanit që ofrojnë përbërësit ose erëzat kryesore për shumë nga këto pjata.

Ngjarjet publike të iftarit

Komuna, organizata, biznese dhe madje edhe individë të ndryshëm organizojnë ngjarje të mëdha publike të iftarit, ku njerëzit mblidhen për të “prishur” agjërimin.

Këto ngjarje shpesh zhvillohen në sheshe ose parqe publike, duke promovuar një ndjenjë komuniteti dhe uniteti, përcjell Telegrafi.

Dritat e Sulltanahmetit

Rrethi historik Sultanahmet në Stamboll është zbukuruar me drita të veçanta të Ramazanit gjatë muajit.

Zona përreth Xhamisë Blu dhe Xhamisë së Madhe Hagia Sophia është e ndriçuar bukur, duke krijuar një atmosferë festive dhe shpirtërore.

Festimet e natës

Në qytete të ndryshme, veçanërisht në Stamboll, netët gjallërohen gjatë Ramazanit me ngjarje dhe festa të veçanta.

Lexo po ashtu Rëndësia e muajit të Ramazanit, teologu Flugaj flet për historinë dhe të mirat e agjërimit

Hapësirat publike, xhamitë dhe tregjet shpesh janë të ndriçuara bukur dhe mund të ketë ngjarje kulturore dhe fetare gjatë gjithë muajit.

Shumë njerëzve u pëlqen të bëjnë një shëtitje pas vaktit të iftarit të agjërimit dhe kështu zonat e këmbësorëve do të jenë më të mbushura me njerëz se zakonisht dhe disa dyqane dhe tregje do të qëndrojnë të hapura më vonë.

Seriale televizive dhe programe speciale

Kanalet televizive në Turqi shpesh e rregullojnë programin e tyre gjatë Ramazanit për të përfshirë shfaqje fetare, drama speciale dhe programe kulturore që përputhen me frymën e muajit.

Këto programe tërheqin një shikueshmëri të gjerë dhe seritë dramatike quhen “Ramazan Dizileri”.

Ndryshimet e orarit të transportit

Ekziston një rregull i rëndësishëm në lidhje me transportin dhe trafikun gjatë muajit të Ramazanit dhe ai është të bëni më të mirën tuaj për të shmangur udhëtimin diku afër iftarit.

Ndërkohë që ora para iftarit do të jetë një kohë jashtëzakonisht e mbushur me njerëz për transport dhe trafik, sapo të fillojë iftari do të ndodhë e kundërta dhe papritmas rrugët do të jenë të qeta.

Shërbimet e transportit publik janë shtuar gjatë muajit të Ramazanit si metroja e Stambollit që funksionon deri në orën 1 të mëngjesit.

Mbani në mend se drejtuesit e mjeteve gjithashtu mund të jenë të trazuar në afërsi të orës së iftarit si dhe gjatë gjithë ditës për shkak të sfidave të agjërimit.

Taksitë veçanërisht mund të mos duan t’i transportojnë klientët afër kohës së iftarit pasi ata mund të dëshirojnë të bashkohen me familjen e tyre për iftar. /Telegrafi/