Publikohet biseda nga dhoma e VAR-it për golin e dyshimtë të Interit ndaj Genoas

Audioja e VAR-it nga goli i Interit kundër Genoas, me një faull të mundshëm të Yann Aurel Bisseck, është publikuar nga DAZN, por ndihmësi i Gianluca Rocchi, Andrea Gervasoni tha se duhet të ishte rishikuar në monitorin e fushës.

DAZN publikoi audion e VAR-it nga goli i diskutueshëm i Interit kundër Genoas në raundin e 19-të. Marko Arnautovic u dha epërsinë Nerazzurrëve para pushimit, por mund të ishte anuluar për një shtytje të Bisseck ndaj Kevin Strootman.

Zyrtari i VAR-it, Massimiliano Irrati shqyrtoi incidentin ndërsa lojtarët e Genoas protestuan kundër arbitrit Daniele Doveri në fushë. Irrati u dëgjua duke thënë: “Më lejoni ta shoh këtë shtytje të mundshme; më jep një kënd tjetër… jo, ky, jo”.

Lexo po ashtu Gjyqtarët konfirmojnë se goli i Interit me Veronën duhet të anulohet

Aksioni i Interit vazhdoi dhe Irrati kontrolloi nëse Nicolo Barella e kishte prekur topin me krah dhe nëse Arnautovic ishte jashtë loje.

“Le të kontrollojmë. Ky nuk është një lojë me dorë. Këtu nuk ka lojë me dorë. Tani le të shohim nëse dikush ishte jashtë loje. Mund të më jepni edhe një kënd për të parë nëse ishte një top me dorë? Jo, këmbë. Dani, Massi, goli është i vlefshëm. Mund të rifilloni lojën”, ka shtuar më tej ai.

Ndihmësi i Rocchit, Gervasoni, ishte në studion e DAZN të dielën mbrëma për të komentuar vendimin e Irratit dhe Doverit, por pranoi se arbitri duhet të kishte parë gabimin e mundshëm të Bisseck në monitorin e fushës.

“Këtë sezon, ne kemi anuluar një gol në Verona – Lazio për një incident të ngjashëm, me një kontroll VAR. Nicolo Casale e kishte shtyrë kundërshtarin me dy krahë dhe ne thamë se këto incidente duhet të kontrollohen gjithmonë pasi mund të jenë vepra të dënueshme”.

“Ndoshta Massimiliano (Irrati) e ka parë si një shtytje të lehtë, por si komision kemi menduar që për të qenë koherent dhe transparent, arbitri duhet të rishikojë gjithmonë një shtytje me dy krahë. Pra, në këtë rast, arbitri duhet të kishte kontrolluar incidentin në ekranin e fushës dhe mendoj se ai do të kishte vendosur të anulonte golin”, vazhdoi ai.

Sidoqoftë, Gervasoni konfirmoi besimin e tij te Irrati “me përvojë”, i cili konsiderohet si zyrtari më i mirë i VAR-it në Itali, dhe tha se 44-vjeçari ka punuar “me të vërtetë mirë teknikisht”.

Gervasoni tha gjithashtu se Interit duhet t’i ishte anuluar një tjetër gol javën e kaluar, kur Alessandro Bastoni goditi me bërryl mbrojtësin e Hellas Verona, Ondrej Duda, përpara golit triumfues Davide Frattesit. /Telegrafi/