Arrestimi dhe rrahja e Sanduloviqit, reagon deputetja e LVV-së: Serbia, shtet satelit rus që tenton të mashtrojë perëndimin

Deputetja e Lëvizjes Vetëvendosje, Jeta Statovci, ka thënë se është sfidë e madhe dhe fat i keq për Kosovën, që ka fqinj shtetin e Serbisë.

Këtë deklarim ajo e ka bërë pasi BIA serbe ka arrestuar dhe torturuar liderin e Partisë Republikane Serbe, Nikola Sanduloviq, pas publikimit të pamjeve ku i njëjti shihet duke bërë homazhe në Prekaz dhe duke kërkuar falje për krimet e Serbisë në Kosovë.

Lexo po ashtu Nikola Sanduloviq në paraburgim: Heshtje në Serbi, reagime nga niveli më i lartë në Kosovë

“Arrestimi, tortura dhe helmimi i liderit opozitar serb Nikola Sanduloviç na kujton me çfarë kemi pasë të bëjmë historikisht si komb, dhe me çfarë kemi të bëjmë akoma si fqinj. Teknika e përdorimit të shërbimeve sekrete për shkatërrimin e oponencës politike, është karakteristikë vetëm e vendeve që luftojnë fuqishëm vlerat e demokracisë, pra vlerat perëndimore”, ka shkruar Statovci në Facebook.

“Fatkeqësisht, tashmë mund të shihet edhe më qartë se Kosova ka në kufi një shtet satelit rus, që tenton të mashtrojë perëndimin, por minon çdo vlerë të përbashkët me Perëndimin”, ka shtuar ajo.

Kryetari i Partisë Republikane të Serbisë, Nikola Sanduloviq, është kthyer në shtëpi në gjendje të rëndë shëndetësore. E bija e tij, Klara, ka treguar se babai i saj ka shenja të panumërta trupit dhe lëndime si pasojë e goditjeve.

Sipas asaj që ka thënë Klara, Sanduloviq ka mbetur i paralizuar, derisa ajo shton edhe dyshimet për helmimin e tij, ndërsa tregon edhe fragmente nga moment i arrestimit nga BIA.

“Dje gruaja e tij e ka gjetur derën e shtëpisë të shkyçur dhe babai nuk ishte askund. Ajo menjëherë ka shkuar në polici, për ta raportuar zhduken e tij dhe aty asaj i është thënë ‘mos u brengosni, ai është i sigurt dhe do të kthehet’. Kjo ishte shenja se diçka nuk ishte në rregull”, ka thënë Klara.

“Mëngjesin e sotëm ajo ka pritur deri në orën 09:00 te spitali, pasi e kishte kuptuar se ishte aty, pa i dhënë askush informacion, por vetëm që ishte nën kujdesin e shërbimit ushtarak dhe se informacione mund të jepte vetëm një ‘doktor i besueshëm’”.

“Ai dyshohet se ka mbetur i palëvizshëm, gjithçka duket se ai është helmuar me agjent nervor”, ka shtuar ajo. /Telegrafi/