Haradinaj: Kurti e vendosi Kosovën në pozicionin e duhur, BE duhet t’i heqë sanksionet

Kuvendi i Kosovës ka nisur seancën e veçantë ku në rend dite është miratimi i Deklaratës në mbështetje të Rezolutës së Parlamentit Evropian, e datës 19 tetor 2023, mbi zhvillimet e fundit në dialogun Serbi-Kosovë, përfshirë situatën në komunat veriore të Kosovës.

Kryetari i AAK-së, Ramush Haradinaj duke folur edhe për takimet e së enjtes në Bruksel në kuadër të dialogut Kosovë-Serbi ka deklaruar se kryeministri Albin Kurti e ka vendosur Kosovën në pozicionin e duhur, transmeton Telegrafi.

Lexo po ashtu Gashi: Kurti pranoi draft-statutin e Asociacionit për të cilin organizoi protesta e humbën jetë njerëzish

“Kurti e vendosi Kosovën në pozicionin e duhur. BE duhet t’i heq sanksionet. Qeveria ka marrë vendim për zbatimin e marrëveshjes, prandaj duhet BE t’i heqë sanksionet. Besoj presidenti francez ndjehet mirë, Kosova e ka mbajtur fjalën”, pohoi ai.

Ai më tej shtoi se interesi i Kosovës është anëtarësimi në NATO.

Ndërkaq, shefi i GP të AAK-së, Besni Tahiri deklaroi se deputetët e LVV-së kanë bojkotuar seancën dhe se nuk dihet arsyeja.

“Nuk është koha për beteja politike. Qëllimi është që si Kuvend të bëjmë një veprim duke shprehur falënderim në raport me rezolutën e Parlamentit Evropian. E shoh si veprim të papërgjegjshëm, si pamaturi”, tha ai.

Tutje, ai deklaroi se LVV ka frikë të përballet me Kuvend.

“Nuk e di pse nuk janë këtu, e çka po i frikëson mos me qenë në Kuvend”, tha ai.

Seanca ka përfunduar pas deklarimit të disa deputetëve të opozitës.

Telegrafi ka tentuar të marrë një përgjigje nga LVV se pse është bojkotuar seanca, por deri tani nuk ka pranuar ndonjë përgjigje. /Telegrafi/