Sveçla viziton veriun një ditë pasi u kërcënua nga organizata terroriste serbe “Severna Brigada”

Ministri i Punëve të Brendshme (MPB), Xhelal Sveçla, këtë të mërkurë ka vizituar veriun e vendit.

Ai ka uruar zyrtarët policorë me rastin e 24-vjetorit të themelimit të Policisë së Kosovës.

Kështu ka bërë të ditur për Telegrafin zëdhënësja e MPB-së, Nora Fetoshi.

Ndryshe, vizita e Sveçlës në veri vjen një ditë pasi është kërcënuar nga organizata serbe “Severna Brigada”.

Lexo po ashtu Kërcënimet nga organizata terroriste serbe 'Severna Brigada', Sveçla: Armiqtë do të japin llogari para ligjit

Lidhur me këtë, ministri në një deklarim para mediave gjatë ditës tha se “armiqtë do të përfundojnë gjithmonë duke dhënë llogari para ligjit”.

Ai tutje u shpreh se ndjehet jashtëzakonisht i sigurt falë Policisë së Kosovës dhe profesionalizimit të saj.

“Unë ndihem jashtëzakonisht i sigurt, mu falë Policisë së Kosovës dhe profesionalizimit të tyre, pra sukseset e PK-së, ajo që na garanton që qytetarët të kenë jetë të qetë, e institucionet të punojnë të sigurta. Patjetër, se në luftën tonë për drejtësi, për rend dhe ligj, gjithmonë do të ketë armiq të kësaj lufte, të cilët në një mënyrë apo tjetër do të godasin institucionet e Kosovës”.

“Mos të harrojmë se edhe vet PK ka policë të rënë në detyrë, të cilët nuk janë në mesin tonë për të festuar, por janë familjaret e tyre, të cilëve jua uroj ditën e Policisë. Punët vazhdojnë, armiqtë tanë do të përfundojnë gjithmonë duke dhënë llogari para ligjit”, tha Sveçla. /Telegrafi/