Fshehja e armëve serbe nëpër kisha, ish-ushtarakët e UÇK-së: Kisha Ortodokse Serbe historikisht i ka bekuar grupet kriminale

Për ish-komandantin e UÇK-së, Sadik Halitjaha dhe ish-ushtarakun, Hysen Gecaj, nuk është e befasishme fshehja e armëve, që vijnë nga Serbia, në kishat ortodokse serbe në Kosovë.

Halitjaha ka thënë se edhe në të kaluarën Kisha Ortodokse sllave e ka bekuar ushtrinë e Serbisë, për të vrarë shqiptarë në Kosovë.

“Kamuflimet e tyre kanë qenë kështu, ata janë mjeshtër të mashtrimeve. Askund në botë institucionet fetare nuk merren me luftë. Këtu vetë kisha merr në gjirin e saj kriminelë, i pagëzon kriminelët, i përgëzon dhe i kërkon sa më shumë koka të shqiptarëve. Kjo ka ndodhë në kohë të luftës. Kisha Ortodokse Serbe është më shumë është kishë kriminale se fetare. Kemi prova”, ka thënë ai.

Njëjtë mendon edhe ish-ushtaraku, Gecaj, i cili ka thënë se historikisht, Kisha Ortodokse Serbe i ka “bekuar kriminelët”.

“Kisha Ortodokse Serbe nuk është befasi. Pa dashur të lëndohen ndjenjat fetare. Kisha Ortodokse Serb, gjithmonë ka dhënë bekim në të gjitha luftërat e kaluara. Kjo traditë e ka gjenezën e vet që nga Lufta e Dytë Botërore. Historikisht ka bekuar grupet kriminale”, ka thënë ai.

Lexo po ashtu Deputetja britanike: Serbia po kontrabandon armë në veri përmes autoambulancave, të njëjtat po dërgohen në kishat ortodokse

Gecaj tha se informacionet që i ka dhënë deputetja e Britanisë së Madhe, Alicia Kearns, është dashur t’i japë KFOR-i, apo institucionet e sigurisë së Kosovës.

“Është befasi që një deklaratë e tillë del nga një deputete britanike. Është serioze. Ai armatim i futur në Kosovë me autoambulanca është shqetësim, që grupe të caktuara mund të shkaktojnë akte terroriste. Një informatë e tillë do duhej të dilte nga KFOR-i. Kjo informatë është dashur të rrjedhë nga komanda e KFOR-it dhe institucionet e Kosovës”, ka thënë ai.

Ndërkaq, Halitjaha tha se për lokacionet e armëve në veri është e informuar edhe AKI-ja.

“Ka të dhëna edhe nga AKI-ja, se armët janë fut në veri. Mendohet se në pesë lokacione ka armë. Janë përdor kishat, siç e pamë në media përmes ndihmës së shpejtë. Armët janë të kalibrit të rëndë, që shkatërrojnë tanke, autoblinda. Kishte zolla, murtaja dhe armë të tjera. Është gjendje e rrezikshme, por mënyra si po i qasen për ta shtensionuar po duket sikur mos me dashtë ta shtensionojnë, sepse këto kanë ndodhur që prej kohës së ‘Rojave të urave’”, ka thënë ai, për RTV Dukagjini.

Një ditë më parë, deputetja britanike Alicia Kearns, tha se janë kontrabanduar armë nga Serbia në Kosovë, dhe përmes autoambulancave janë fshehur në kishat ortodokse në veri.

Ndërsa, The GeoPost, medium i cili mbulon Ballkanin Perëndimor, ka publikuar një video në të cilën pretendon të verifikojë atë që deklaroi deputetja e Britanisë së Madhe, Alicia Kearns, se serbët po kontrabandonin armatim nëpër kisha ortodokse në Kosovë me ambulanca.

Lidhur me pretendimet e deputetes britanike Kearns, Telegrafi ka pyetur KFOR-in për të marrë një qëndrim rreth kësaj çështje.

Përmes një përgjigje me shkrim, KFOR-i ka theksuar se nuk ka asnjë provë për atë që është raportuar, dhe se deputetja i referohet ngjarjes së vitit 2022, kur Batalioni Mbretëror Fusilier (regjiment ushtarak britanik), u punësua në Kosovë.

“Ngjarja e përmendur nga deputetja britanike i referohet vitit 2022 kur Batalioni Mbretëror Fusilier u punësua në veri të Kosovës në mbështetje të misionit të KFOR-it. Prezenca e supozuar e armëve ilegale është raportuar në Shtabin e KFOR-it, por pas hetimeve të mëtejshme për të gjetur konfirmimin e kësaj, nuk ka dalë asnjë provë për atë që është raportuar”, thuhet në përgjigjen e KFOR-it për Telegrafin.

Edhe kryeministri i Kosovës, Albin Kurti, konfirmoi të mërkurën se kanë marrë informacion se Serbia po kontrabandon armë përmes autoambulancave.

Lexo po ashtu Kurti: Kemi informacion se Serbia po kontrabandon armë me autoambulanca, do të takohem me përfaqësuesit e NATO-s

Në një konferencë për media, Kurti tha se për këtë çështje gjatë ditës do të takohet me komandantin e KFOR-it si dhe përfaqësuesit e NATO-s, transmeton Telegrafi.

“Kemi informacion se veturat e ambulancave janë përdorur për të bartur armatim. Unë sot do ta kem një takim me përfaqësuesit e NATO-s për këtë gjë. Do ta takoj edhe komandantin e KFOR-it. Dhe pas këtyre takimeve edhe me organet tona të sigurisë, do të mund ta japim fjalën përfundimtare”, tha ai. /Telegrafi/