Takimi i presidentes Osmani me Haradinajn, deklaratat dhe refuzimi i ftesës nga Krasniqi e Abdixhiku

Presidentja e vendit, Vjosa Osmani të enjten ka ftuar në takim krerët e partive opozitare në vend për të diskutuar lidhur me zhvillimet e fundit në vend.

Takimit i është përgjigjur vetëm kryetari i Aleancës për Ardhmërinë e Kosovës, Ramush Haradinaj, ndërkaq kryetari i Partisë Demokratike të Kosovës, Memli Krasniqi dhe ai i Lidhjes Demokratike të Kosovës, Lumir Abdixhiku kanë refuzuar ftesën e Osmanit, duke e konsideruar si të vonshme.

Krasniqi përmes një statusi në rrjetin social në Facebook ka shkruar se të mërkurën ka pranuar nga presidentja Osmani një letër me të cilën e ka ftuar në takim, pas një propozimi nga kryetari i AAK-së.

Tutje ai tha se gjatë këtyre ditëve të vështira për Kosovën, me indinjatë ka vërejtur se Presidentja ka qëndruar e heshtur dhe ka neglizhuar obligimin e saj kushtetues për të garantuar unitetin qytetar, për të ruajtur marrëdhëniet me partnerët strategjikë ndërkombëtarë dhe për të vepruar si institucion mbi palët, raporton Telegrafi.

Lexo po ashtu Krasniqi refuzon ftesën e Osmanit për takim: I indinjuar me heshtjen e saj

“Prandaj, duke u nisur nga këto, por edhe arsye të tjera që i kam shtjelluar në letrën e përgjigjes së sime e kam parë të udhës që ta refuzoj pjesëmarrjen në këtë takim”, tha Krasniqi.

Ftesën e Osmanit e ka refuzuar edhe kryetari i LDK-së, Lumir Abdixhiku.

Kryetari i LDK-së ka thënë se ka përcjell me shqetësim zhvillimet e fundit politike në vend, siç është shprehur ai, qasjen e papërgjegjshme të kryeministrit Kurti në raport me ShBA-në, BE-në dhe NATO-n.

Abdixhiku ka thënë se LDK nuk mund të pranojë as të tolerojë përplasje të Kosovës me aleatët e saj.

Ndërkaq, ftesës së presidentes Osmani për takim i është përgjigjur kryetari i AAK-së, Ramush Haradinaj.

E në njoftimin e Presidentes thuhet se Osmani e ka parë të nevojshme që të mbajë komunikim të rregullt edhe me partitë opozitare, nëpërmjet ftesave të vazhdueshme për takime e ngjarje të ndryshme.

Osmani në takimin me Haradinaj, siç thuhet në njoftim ka këmbyer pikëpamjet në raport me zhvillimet e fundit politike dhe të sigurisë në vend.

Presidentja ka shprehur keqardhje që partitë e tjera opozitare kanë refuzuar mundësinë që ta japin kontributin e tyre për çështje të interesit nacional, përfshirë përpjekjet për fuqizimin e aleancave strategjike e ekzistenciale të Republikës së Kosovës me partnerët, e në veçanti me Shtetet e Bashkuara të Amerikës.

Ajo ka ritheksuar, se në përputhje me Kushtetutën do të vazhdojë të angazhohet në përfaqësimin e unitetit qytetar, mbrojtjen e kushtetutës, ruajtjen dhe fuqizimin e aleancave strategjike, sikurse edhe krijimin e një klime konstruktive për t’i adresuar sfidat dhe çështjet e rëndësishme në Republikën e Kosovës.

Lexo po ashtu Osmani jep detaje për takimin me Haradinajn, shpreh keqardhje për refuzimin e LDK-së e PDK-së

Sipas presidentes Osmani, kontributi i secilit lider dhe subjekti politik është të bashkëpunojë për çështje të rëndësisë nacionale me institucionet shtetërore, por jo duke refuzuar.

Pavarësisht kësaj, Osmani ka bërë të ditur se dera e zyrës së saj vazhdon të jetë e hapur për liderë institucionalë dhe parti politike, në funksion të mbrojtjes së interesit shtetëror.

Ndërkaq, pas takimit me presidenten Vjosa Osmani, kryetari i AAK-së, Ramush Haradinaj, ka thënë se i ka shprehur asaj shqetësimet për humbjen e besimit të partnerëve dhe ndëshkimet që sipas tij po merr vendi.

Haradinaj tha se presidentes i ka kërkuar që të veprojë në përputhje me mandatin e saj, të kthejë besimin e aleatëve dhe të ndodh deeskalimi i situatës në veri të vendit.

“Biseda ishte e hapur, i shpreha shqetësimet për situatën, shqetësimet e mija për humbjen e besimit të partnerëve tanë, për ndëshkimet që po merr Kosova, për vështirësitë që do t’i kemi nëse nuk dalim nga kjo gjendje.

I kërkova Osmanit që të veprojë në përputhje me mandatin e vet, që ta kthejë besimin me aleatët tanë, të ndalen ndëshkimet, të ndodh një deeskalim i situatës në veri, t’i kthehemi te arriturave të dialogut, marrëveshjes së Ohrit dhe Brukselit”, është shprehur Haradinaj.

Lexo po ashtu Haradinaj: I kërkova Osmanit deeskalim të situatës në veri, dhe kthimin e besimit të aleatëve

Tutje theksoi se fitoret e Kosovës nuk janë të mundura pa mbështetjen e aleatëve.

“Nuk është kohë e kalkulimeve të vogla, mocioni ynë nuk ka të bëjë me luftë për pushtet, nuk jam kandidat për kryetar qeverie pas mocionit, deri në zgjedhjet e ardhshme, ka të bëjë më shumë me ruajt shtetin, me i ndalë ndëshkimet ndaj Kosovës, dhe me rikthy normalitetin në vend, në veri”, deklaroi Haradinaj para mediave. /Telegrafi/