Krasniqi: Studentët nuk po e shohin të ardhmen në Kosovë, kanë humbur shpresën nga mungesa e vizionit qeverisës

Kryetari i Partisë Demokratike të Kosovës (PDK), Memli Krasniqi ka kujtuar 53-vjetorin e themelimit të Universitetit të Prishtinës “Hasan Prishtina”.

Sipas tij ky institucion formësoi identitetin kombëtar, shtroi rrugën akademike dhe zgjoi shpirtin liridashës të qytetarëve të Kosovës.

“UP-ja, që nga themelimi, u kthye në kështjellë të dijes e rezistencës, nga ku, historikisht, studentë e profesorë së bashku, artikuluan aspiratat tona kombëtare dhe projektuan rrugën e lirisë”, ka shkruar Krasniqi në Facebook.

“Kur jemi vetëm dy ditë larg nga festimi i 15 vjetorit të Pavarësisë së Kosovës, shprehim mirënjohjen e madhe për të gjitha gjeneratat e profesorëve, asistentëve, studentëve dhe stafit tjetër përbërës të UP-së, për kontributin e çmueshëm drejt përmbushjes së këtij ideali”, ka vijuar tutje i pari i PDK-së.

Ai thotë se studentët nuk po e shohin të ardhmen në Kosovë, duke renditur shkaqet për të cilat ndodhë një gjë e tillë.

“Fatkeqësisht, sot, shumë studentë të jashtëzakonshëm nuk po e shohin të ardhmen në Kosovë. Shkaqet tashmë janë të mirënjohura: mundësitë e kufizuara të punësimit, humbja e shpresës dhe mungesa e vizionit qeverisës”.

Opozitari  thotë se nëse ekziston sot një prioritet për të cilin duhet të përkushtohemi të gjithë – ai është rikthimi i besimit tek të rinjtë për të ndërtuar një të ardhme të sigurtë dhe të mirëfilltë në vendin tonë.

“Ndërtimi i një shteti i cili krijon më shumë mundësi për përmbushjen e potencialit rinor – është i vetmi çelës për të mbajtur rininë tonë të mrekullueshme në vend – e për të cilën kemi aq shumë nevojë”.

“Rinia ka qenë forca shtytëse në rrugën e lirisë dhe pavarësisë. Rinia duhet të jetë edhe energjia e cila ndërton dhe zhvillon vendin tonë”, ka shkruar ndër të tjera Kryetari i PDK-së./Telegrafi/