E konfirmon Zelensky: Jam rrugës për në SHBA, atje do të bisedoj me Bidenin

Presidenti ukrainas Volodymyr Zelensky do të pritet sot në Washington nga zyrtarët amerikanë, në udhëtimin e tij të parë ndërkombëtar që nga fillimi i luftës në Ukrainë.

Edhe vetë presidenti ukrainas ka konfirmuar se është rrugës për në Shtetet e Bashkuara, transmeton Telegrafi.

“Jam rrugës për në SHBA për të forcuar aftësitë mbrojtëse të Ukrainës. Biden dhe unë do të diskutojmë bashkëpunimin midis Ukrainës dhe SHBA-së dhe gjithashtu do të mbaj një fjalim në Kongres dhe do të kem një sërë takimesh dypalëshe”, ka shkruar Zelensky në Tëitter.

Pas deklaratave të tij edhe Shtëpia e Bardhë e konfirmoi këtë, duke theksuar se Zelensky do të paraqitet në Kongres, dhe do të mbajë një sërë takimesh dypalëshe dhe të zhvillojë një takim me presidentin amerikan Joe Biden.

Kryetarja e Dhomës së Përfaqësuesve, Nancy Pelosi, lëshoi ​​një deklaratë me shkrim, në të cilën ajo “inkurajon” ligjvënësit që të jenë “fizikisht të pranishëm” të mërkurën mbrëma, për një seancë “veçanërisht kushtuar demokracisë”.

Kjo vizitë vjen në një kohë kur ligjvënësit amerikanë po përgatiten të votojnë për një pako të re të madhe ndihme për Ukrainën, raporton AFP.

Presidenti amerikan duhet të japë dritën jeshile për dërgimin e raketave Patriot, një sistem veçanërisht të sofistikuar të mbrojtjes ajrore në Ukrainë.

Presidenti ukrainas pritet të vizitojë Shtëpinë e Bardhë dhe Kongresin amerikan të mërkurën, megjithëse shqetësimet e sigurisë mund të ndryshojnë këto plane, raportoi Reuters, duke cituar dy burime të njohura me planifikimin e vizitës.

Punchbowl News ishte i pari që raportoi për shkuarjen e mundshme të Zelenskyt në Washington, duke cituar nëntë burime të njohura me udhëtimin.

Gjithashtu bëri të ditur se Zelensky pritet të takohet me udhëheqjen e Kongresit, dhe me krerët e komiteteve të sigurisë kombëtare nga partitë republikane dhe demokrate, dhe se mund të flasë në një seancë të përbashkët të Kongresit.

Dje, presidenti ukrainas bëri një paraqitje të paparalajmëruar në Bakhmut, një qytet në vijën e parë të frontit, ku luftimet më të përgjakshme mes ushtarëve rusë dhe ukrainas po zhvillohen prej muajsh. Ai vizitoi trupat dhe u dha çmime ushtarëve, njoftoi zyra e tij. /Telegrafi/

On my way to the US to strengthen resilience and defense capabilities of 🇺🇦. In particular, @POTUS and I will discuss cooperation between 🇺🇦 and 🇺🇸. I will also have a speech at the Congress and a number of bilateral meetings.

— Volodymyr Zelenskyy / Володимир Зеленський (@ZelenskyyUa) December 21, 2022