Kapen 12 emigrantë të paligjshëm në Vlorë, arrestohet 35-vjeçari

Policia e Vlorës ka njoftuar sot arrestimin në flagrancë të shtetasit A. H., 35 vjeç, banues në Sarandë pasi është kapur duke trasportuar me 12 emigrantë të paligjshëm në rrugën e bypassit të Vlorës.

Sipas policisë, vijojnë goditjet e njëpasnjëshme ndaj veprimtarisë kriminale në fushën e dhënies ndihmë shtetasve të huaj, për kalim të paligjshëm të kufirit, kundrejt fitimit.

“Shërbimet e Forcës së Posaçme “Shqiponja”, në DVP Vlorë, në vijim të punës për goditjen e aktivitetit kriminal të dhënies ndihmë shtetasve të huaj, për kalim të paligjshëm të kufirit, kundrejt fitimit, në bazë të informacioneve policore, kanë organizuar dhe finalizuar me sukses operacionin policor “Bypass”, si rezultat i të cilit u arrestua në flagrancë shtetasi A. H., 35 vjeç, banues në Sarandë”, ka njoftuar policia.

“Arrestimi i këtij shtetasi u bë pasi u kap në flagrancë nga shërbimet e Policisë, në aksin rrugor Kaninë – Alikok, duke transportuar me një mjet tip furgon, 12 emigrantë të paligjshëm, kundrejt fitimit”, tha policia. /Telegrafi/