Nuhiu: Na pret ndeshjen e vështirë, por mundësi e mirë të tregojmë vlerat tona

Trajneri i Dritës, Ardian Nuhiu ka dal në konferencën për shtyp para duelit të kthimit me Royal Antwerp.

Trajneri shkupjan i gjilanasve ka folur për duelin e ditës së enjte i vlefshëm për rrethin e dytë të Ligës së Konferencës.

Drita arriti një barazim pa gola në ndeshjen e parë dhe synon ta befasoj skuadrën belge në Prishtinë për të kaluar tutje.

“Skuadra jonë është mirë. Futbollistët janë të fokusuar në ndeshje. Shoh një motiv të veçantë për ndeshjen e nesërme. Na pret një sfidë e madhe, realisht një mundësi shumë e mirë për futbollistët tanë të tregojnë vlerat”.

“Kemi analizuar kundërshtarin. Jemi të vetëdijshëm për vështirësinë e ndeshjes. Kemi analizuar dy ndeshjet, ndaj nesh edhe atë në kampionat të Antwerp”.

“Bëhet fjalë për një skuadër agresive, skuadër që bën presion të lartë, me individë shumë cilësor. Për të gjitha këto kemi pasur javën e kompletuar të përgatitemi. Unë kam besim të plotë te skuadra jonë që do të përformohet mjaft mirë atë që kemi përgatitur”, ka thënë Nuhiu. /Telegrafi/