Borxhi i madh që Barcelona i ka De Jongut, një nga arsyet që futbollisti refuzon të largohet

Frenkie de Jong është ndër emrat më të përfolur të afatit kalimtar veror 2022, me Barcelonën që dëshiron ta shesë, ndërsa futbollisti deri më tani ka hezituar të largohet.

Manchester Unitedi është klubi kryesor që i kërkon shërbimet e tij, porse janë disa çështje që e komplikojnë largimin e holandezit – më e rëndësishmja ka të bëjë me paratë që Blaugranët i kanë borxh 25-vjeçarit, si pjesë e kontratës luksoze.

Lexo po ashtu Koha po kalon, Barca vazhdon të jetë në telashe – detyrohet të shesë lojtarë, para se t’i regjistrojë transferimet e reja

Sa para Barcelona i detyrohet De Jongut

Mesfushori është pjesë e katalunasve nga vera e vitit 2019 kur e kompletoi transferimin nga Ajaxi për 75 milionë euro.

Ai ka regjistruar 140 paraqitje për klubin, nën drejtimin e trajnerëve Ernesto Valverde, Quique Setien, Ronald Koeman dhe Xavi, ndërsa te të gjitha ka pasur pozitë të rregullt në skuadër.

Megjithatë, problemet financiare të Barcelonës kanë pasur ndikim të madh në aspektin financiar të lojtarit. Sipas Goal, klubi i ka borxh 17 milionë euro De Jongut dhe për këtë arsye, hezitimi i tij për t’u larguar është i kuptueshëm.

Pse i detyrohet Barcelona kaq shumë para De Jongut

Borxhi i grumbulluar nga Barca është rezultat i masave drastike të vendosura gjatë pandemisë COVID-19, kur klubet në mbarë botën duhej të mbylleshin plotësisht përpara se të ktheheshin në aksion me dyert e stadiumeve të mbyllura.

Lojtarët ranë dakord të shtyjnë marrjen e pagave që u detyroheshin klubet në atë kohë, me Blaugranët që përpiqeshin dëshpërimisht të mbanin rezervat e tyre të balancuara.

Lexo po ashtu De Jong largohet nga Barca vetëm për Chelsean

Synimi ishte që pagesat e prapambetura të shpërndaheshin në pjesën e mbetur të çdo kontrate të caktuar, me De Jong që ka kontratë deri në vitin 2026.

Barca thuhet t’i ketë bërë ofertë holandezit një shumë më të vogël nga ajo që i detyrohet, ndërsa janë diskutuar gjithashtu planet për të ulur pagën e tij vjetore në gjysmë – duke i lejuar klubit të regjistrojë transferime të reja.

Situata e rëndë vazhdon të mbizotërojë, ndërkohë që legjenda e Manchester Unitedit, Gary Neville, e ka këshilluar De Jongun të ndërmarrë veprime ligjore ndaj klubit dhe bashkëlojtarët duhet ta mbështesin për faktin se “është imorale dhe një shkelje që një klub të shpenzojë para të majme në transferime të reja, ndërkohë që nuk i paguan ata që i ka nën kontratë”. /Telegrafi/