Benzema flet për fillimin e tij të vështirë te Real Madridi, problemin që kishte me Mourinhon, raportin me CR7 dhe Kupën e Botës

Karim Benzema ka folur për stilin e tij të lojës, fillimet e tij në Real Madrid dhe problemin e vogël që kishte dikur me trajnerin Jose Mourinhon. Francezi ka folur edhe për ish-bashkëlojtarin Cristiano Ronaldo dhe Kupën e Botës.

Pas një sezoni të suksesshëm, Benzema ka bërë bilancin dhe ka parë karrierën e tij deri më tani.

“Unë luaj me instinkt, jam një lojtar instinktiv dhe çfarëdo që më vjen në kokë e bëj në fushë”, ka thënë fillimisht Benzema për Onze Mondial në një intervistë, kur u pyet për qasjen e tij në fushën e futbollit.

“Unë kurrë nuk i them vetes ‘Do të luaj kundër këtij mbrojtësi, duhet të bëj këtë apo atë’”.

Lexo po ashtu Benzema, lojtari më i mirë, Vinicius , talenti më i mirë - UEFA nderon dy yjet e Real Madridit për sezonin fantastik në Ligën e Kampionëve

Benzema gjithashtu shtjelloi ditët e tij të hershme në Real Madrid dhe vështirësitë me të cilat u përball në fillim.

“Sezoni im i parë, gjashtë muajt e parë, ishin shumë të vështira, pasi isha vetëm dhe nuk flisja gjuhën, kështu që gjithçka ishte e ndërlikuar”.

“Kisha ardhur në një botë të re, me një ekip të ri, një lloj tjetër futbolli. Për fat nuk u dorëzova”.

“Mbaj mend që kisha një problem të vogël me Jose Mourinhon në një moment. Ne u takuam në hotel dhe patëm një bisedë një ditë para ndeshjes kundër Real Mallorca”.

“Unë nuk duhej të luaja ndeshjen dhe, ndërsa po grindeshim, i thashë “Nesër më vendosni titullar, unë do të shënoj dhe do të bëj që ty ta fitosh lojën”. Të nesërmen shënova dhe fituam 1 -0”.

Benzema diskuton lidhjen e tij me Cristiano Ronaldon

Cristiano Ronaldo është një nga lojtarët nga të cilët Benzema është frymëzuar gjithmonë dhe këtë e ka diskutuar në intervistë.

“Kur e shikoja atë që bënte, u përpoqa të përqendrohesha në lëvizjet e tij: driblimin, përfundimin, pasimin, trajtimin e topit të tij, ndava gjithçka rreth tij”.

“Por, atëherë është e pamundur të arrihet e njëjta gjë”, shtoi francezi.

Benzema dëshiron një triumf në Kupën e Botës

Pavarësisht nga një kabinet i mbushur me trofe, Benzema ende ëndërron të fitojë disa të tjera, veçanërisht Kupën e Botës pasi ai nuk ishte pjesë e skuadrës së Francës në vitin 2018.

“Kam ende shumë gjëra në kokën time”.

“Dua të fitoj më shumë tituj, më shumë Liga të Kampionëve. Dhe me kombëtaren, Kupën e Botës. Kjo është gjithçka që kam si ëndërr”, përfundoi ylli i Real Madridit. /Telegrafi/