Kurti flet për qeverisjen një-vjeçare: Kemi respektuar kushtetutshmërinë dhe ligjshmërinë

Kryeministri Albin Kurti ka deklaruar se qeveria e udhëhequr nga ai në vazhdimësi ka respektuar kushtetutshmërinë dhe ligjshmërinë.

Këtë deklaratë ai e ka bërë sot, e diel, në mbledhjen e 47-të e Këshillit të Përgjithshëm, derisa ka folur për qeverisjen e tij një-vjeçare.

“Kemi menaxhuar suksesshëm me pandeminë duke qenë në rajon vendi me numrin më të vogël të vdekjeve dhe shkallën më të lartë të vaksinimit. Kemi shënuar rritje dyshifrore ekonomike. Kemi bërë hapa të rëndësishëm në përmirësimin e sistemit të drejtësisë”.

“Kemi luftuar pa kompromis korrupsionin dhe krimin e organizuar. Kemi zbatuar politika sociale që përmirësojnë mirëqenien e qytetarëve tanë. Kemi avancuar aleancat dhe partneritetin me shtetet mike dhe kemi treguar solidaritet ndërkombëtar me popujt në nevojë. Dhe, kemi pasur një koordinim të shkëlqyer institucional mes presidencës, kuvendit dhe kryeministrisë”, ka thënë Kurti.

Mes tjerash, kreu i ekzekutivit ka thënë se matjet e publikuara nga organizatat e jashtme po e nxjerrin Kosovën si fanar të demokracisë. E sipas tij, ato tregojnë më së miri “ndryshimin substancial në vendin tonë, ndryshimin përmbajtjesor të imazhit të Kosovës, si dhe japin hapësirën e duhur të aplikojmë për anëtarësim në Këshillin e Evropës, në Partneritetin për Paqe të NATO-s dhe në Bashkimin Evropian”.

“Në lidhje me vizitën e gjatë dhe të frytshme jashtë vendit në ShBA dhe Zvicër, Kurti tha se ato janë zhvilluar me sukses në shërbim të shtimit të mundësive për investime dhe siguri në Kosovë. Te çështjet organizative ku tash në qendër kemi procesin e brendshëm zgjedhor, Kryetari Kurti foli për rëndësinë që kanë dy organet e reja Gratë për VETËVENDOSJE!-n dhe Rinia për VETËVENDOSJE!-n në fuqizimin e mëtejmë të grave dhe rinisë përbrenda organizatës, dhe për nevojën e organizimit të mërgatës në një formë të re më të përshtatshme dhe efikase”. /Telegrafi/