Konferenca “Rimëkëmbja ekonomike dhe zhvillimi pas kovid”: Çfarë do të shërojë plagët e ekonomisë të shkaktuara nga pandemia?

Besimet dhe shpresat se pandemia globale do të shuhet përfundimisht deri në fund të vitit 2020 kanë rënë në ujë që nga fillimi i vitit kalendarik 2021. Miliona të rinj të infektuar në të gjithë botën, ri-mbyllja e sërishme e vendeve, kufizime të reja në të gjitha aspektet e jetës, ekonomitë botërore në recesion… Asnjë shoqëri, institucion apo sistem qeverisës nuk është lënë i paprekur.

Në këtë situatë, perspektivat për rritjen globale mbeten shumë të pasigurta edhe në këtë vit 2021. Parashikimet e institucioneve financiare ndërkombëtare janë pjesërisht optimiste dhe parashikojnë rimëkëmbje graduale të ekonomive botërore në periudhën e ardhshme, të nxitura më tej nga vaksinimi masiv në botë që do të lejojë konsum dhe investime më të mëdha personale në gjysmën e dytë të vitit.

Por a mund të përfundojë rimëkëmbja e ekonomive në vitin 2021 apo duhet kërkuar shpresë në 2022? A mund të rimëkëmben plotësisht ekonomitë apo do të mbeten disa plagë që nuk ka gjasa të shërohen ndonjëherë? Cilat janë shanset e ekonomive vendore dhe rajonale në këtë drejtim? Përgjigjet e këtyre pyetjeve do të jepen nga përfaqësues të institucioneve më të rëndësishme financiare ndërkombëtare, profesorë universitar, ekspertë monetar dhe financiar, ambasadorë, të cilët do të jenë pjesë e Konferencës së Parë Ndërkombëtare “Rimëkëmbja Ekonomike dhe Rritja pas kovid”.

Nikoqiri i kësaj konference të rëndësishme që do të mbahet në Shkup të hënën dhe të martën është Ministria e Financave, e cila do t’u ofrojë pjesëmarrësve një shkëmbim idesh dhe përvojash në tejkalimin e sfidave të pandemisë Covid-19 nga ekspertë të ndryshëm nga e gjithë bota. Diskutimet që do të hapen do të jenë pika fillestare për zhvillimin e strategjive dhe politikave të ndryshme që duhet të ndihmojnë në rimëkëmbjen e ekonomive në recesion.

Të ballafaquar me sfidën e quajtur Kovid-19, shumica e vendeve në botë kanë vendosur të mbyllin tërësisht ose pjesërisht sektorë të caktuar, një masë që është aplikuar në Maqedoni. Funksionimi i plotë dhe i kufizuar i sektorëve, si dhe mbyllja e kufijve dhe kufizimi i lëvizjes, kanë rezultuar me rënie drastike të ekonomisë. Në përgjigje të kësaj krize, qeveria ka zbatuar pako të ndryshme masash për të mbështetur ekonominë dhe qytetarët, një politikë që vazhdon edhe më tej.

Banka botërore kohët e fundit theksoi se për Maqedoninë ka rreziqe të brendshme dhe të jashtme për rimëkëmbjen e ekonomisë.

“Shërimi do të varet më së shumti nga masat shëndetësore, pra nga dinamika e vaksinimit të popullatës, e cila është e lidhur ngushtë me pasojat ekonomike. Duhet pasur parasysh se vonimi i rimëkëmbjes së ekonomisë do të shkaktonte falimentimin e shumë kompanive”, thanë përfaqësuesit e Bankës Botërore.

Konferenca e ardhshme në Shkup, ndër të tjera, do të japë udhëzime se në çfarë duhet të përqëndrohen faktorët dhe qeveritë globale në mënyrë që të forcojnë mbështetjen ekonomike dhe sociale dhe të shërojnë plagët e thella të pandemisë.