PDK: Në listat e kandidatëve për deputet do të garojmë me fytyra të reja dhe pa aktakuza

Zgjedhjet e parakohshme pritet të mbahen më 14 shkurt të këtij viti, e ndërkaq edhe partitë politike janë të obliguar që të përgatisin listat e tyre me kandidatët për deputet qoftë figura të reja politike apo edhe ata që jemi mësuar tashmë t’i shohim.

Zëdhënësi i Partisë Demokratike të Kosovës (PDK), Avni Bytyçi në një prononcim për Telegrafin ka thënë se kjo parti do të garoj me ftyra të reja.

Ai po ashtu tha se në listat e kandidatëve për deputet nuk do të ketë figura që kanë të ngritura aktakuza apo dënime.

“Gjithsesi, PDK do të garoj me listën më të mirë, me fytyra të reja, e mbi të gjitha me figura të pastërta pa aktakuza dhe dënime”, ka thënë Bytyçi.

Telegrafi është munduar të marrë një prononcim edhe nga Lidhja Demokratike e Kosovës (LDK) dhe Lëvizja Vetëvendosje (LVV), mirëpo të njëjtin nuk kanë kthyer përgjigje.

Lexo po ashtu KQZ vendos që fushata zgjedhore të jetë nga 3 deri më 12 shkurt

Ndërkaq, Komisioni Qendror i Zgjedhjeve (KQZ) ka vendosur që fushata zgjedhore për partitë politike për zgjedhjet e parakohshme të zgjasë 10 ditë, nga data 3 shkurt e deri më 12 shkurt.

Ndryshe, ushtruesja e detyrës së presidentes, Vjosa Osmani ka shpërndarë Legjislaturën e shtatë të Kuvendit të  Kosovës dhe ka caktuar që zgjedhjet parlamentare të parakohshme të mbahen më 14 shkurt. /Telegrafi/