Shpërthimi në Ferizaj, nga 13 të lënduarit që po marrin trajtim në QKUK pesë janë në gjendje më të rëndë

13 persona janë  duke u trajtuar në Qendrën Klinike Universitare të Kosovës (QKUK) nga shpërthimi që ndodhi të martën në Ferizaj, ndërsa pesë prej tyre janë në gjendje më të rëndë.

Drejtori i Klinikës Intensive në QKUK, Shaqir Uka në një prononcim për Telegrafin ka thënë se në Repartin Intensiv të martën kanë pranuar pesë pacientë të cilët janë në gjendje më të rëndë.

Ai tha se shkalla e djegies së sipërfaqes trupore është nga 35 deri në 50 për qind të cilët hyjnë në radhën e pacientëve mjaft të rrezikuar, e sa i përket moshës së tyre ai tha se janë nga 20 deri në 45 vjeç.

“Në Mjekimin Intensiv Qendror dje kemi pranuar pesë pacientë të cilët kanë qenë me lëndime më të rënda nga shpërthimi në Ferizaj. Këta pacientë pas tretmanit që kanë marr në sallën operative të qendrës Emergjente po vazhdojnë të trajtohen në njësinë e mjekimit intensivë qendrore. Mosha e  tyre sillet nga 20 deri 45 vjeçare, shkalla e djegies së sipërfaqes trupore është nga 35 deri 50 për qind. Hyjnë në radhën e pacientëve të cilët janë mjaft të rrezikuar”, ka thënë Uka.

Lexo po ashtu Epilogu i shpërthimit të frikshëm në Ferizaj: Mbi 40 të lënduar, disa me gjendje të rëndë pritet të trajtohen jashtë vendit

Ndërsa, për sa i përket gjendjes shëndetësorë të pacientëve të tjerë të shtruar në QKUK, Uka tha se gjendja e tyre është më stabile.

“Një pacient është në Njësinë e Mjekimit Intensivë në Kardiokirurgji për shkak të mungesës së vendit këtu që kemi poshtë. Dhe shtatë pacientë të tjerë janë të sistemuar në repartin e Kirurgjisë Plastike. Pacientët të cilët janë të sistemuar në Qendrën e Kirurgjisë plastike gjendja e tyre është stabile dhe më e lehtë se e këtyre pacientëve të cilët i kemi në mjekimin intensiv”.

Ndryshe, të martën nga një shpërthim i bombolës së gazit që ndodhi në Ferizaj, 42 persona morën lëndime trupore. /Telegrafi/