Gjilani kundërshton shpalljen e gjendjes së jashtëzakonshme

Në një takim virtual me kryetarët e komunave të Kosovës, për të vlerësuar gjendjen pas rritjes së numrit të të infektuarve dhe viktimave nga COVID-19, kryeministri i Kosovës, Avdullah Hoti ka theksuar se ka marrë përkrahje për masat e reja të Qeverisë së Kosovës, përfshirë gjendjen e jashtëzakonshme, në luftë për parandalimin e përhapjes së COVID-19 dhe ruajtjen e jetës së qytetarëve.

Mirëpo, jo të gjithë kryetarët e komunave janë pajtuar që të shpallet gjendja e jashtëzakonshme në vend. Kundër këtij propozimi ka dalë kryetari i Mitrovicës, Agim Bahtiri. Me një ide të tillë nuk është pajtuar as nënkryetari i Gjilanit, Arbër Ismajli, i cili a thënë kam bërë kërkesën imediate që të mos shpallet gjendje e jashtëzakonshme, për shkak të implikimeve të mëdha socio-ekonomike në vjeshtën e vonshme, si në biznese, poashtu, edhe tek qytetarët, sepse ne si vend edhe ashtu jem në një gjendje të rënduar ekonomike.

Ismaili, i cili ka marrë pjesë në këtë takim në vend të kryetarit Lutfi Haziri, ka thënë se “përgjatë takimit të sotëm virtual me kryeministrin e Republikës, Dr. Avdullah Hoti, bashkëbiseduam lidhur me situatën e krijuar në vend. Kam bërë kërkesën imediate që të mos shpallet gjendje e jashtëzakonshme, përshkak të implikimeve të mëdha socio-ekonomike në vjeshtën e vonshme, si në biznese, poashtu, edhe tek qytetarët, sepse ne si vend edhe ashtu jem në një gjendje të rënduar ekonomike”.

“Z. Hoti, e kam lutur dhe i kam përcjellur kërkesën e bizneseve tona, që të mos iu kufizohet orari i operimit, përshkak të rrezikut të mbylljes së tyre, por të monitorohen vazhdimisht lidhur me respektimin e kushteve të vëna nga IKSHP dhe Ministria e Shëndetësisë. E mira e gjithë kësaj, është se z. Hoti e ka marrë në konsideratë shqetësimin tonë dhe garantoi që do të gjejë modalitete për ta tejkaluar edhe këtë brengë”, ka shkruar Ismajli.

Lexo po ashtu Hoti: Kryetarët e komunave përkrahin shpalljen e gjendjes së jashtëzakonshme

“Poashtu, kemi kërkuar që të rriten kapacitetet në shëndetësi, duke angazhuar staf shtesë dhe shtretër nëpër spitale regjionale. Një ndër masat tjera urgjente të cilën e kemi kërkuar, është edhe rritja e numrit të inspektorëve sanitarë. Gjithashtu, edhe Policia e shtetit duhet të stacionohet në top komunat ku paraqiten më së shumti raste”, ka thënë ai.

Nën organizim të Asociacionit të Komunave të Kosovës, Këshilli i Kryetarëve të Komunave sot kanë zhvilluar takimin virtual të radhës përmes komunikimeve elektronike me Kryeministrin e Republikës së Kosovës, ku kanë diskutuar për mundësinë e shpalljes së Gjendjes së Jashtëzakonshme.

Bëhet e ditur se kundër këtij propozimi në mbledhje ka dalë kryetari i Mitrovicës, Agim Bahtiri, që thotë se e kundërshton dhe e urren këtë propozim.

“Unë s’jam për shpalljen e Gjendjes së Jashtëzakonshme edhe urrej shumë mendimin dhe propozimin për këtë sepse s’mund të ketë gjendje të jashtëzakonshme në gjithë territorin e Kosovës. Kjo na sjell edhe probleme politike dhe është kërkesë e kamotshme e Hashim Thaçit, ka thënë ai. /Telegrafi/