Kryeziu i LVV-së: Po tentohet të merret pushteti në kundërshtim me vullnetin e sovranit

Taulant Kryeziu nga Lëvizje Vetëvendosje thotë se zhvillimet e dy ditëve të fundit flasin për veprime antikushtetuese për tentimin e marrjes së pushtetit.

Kryeziu thotë se kjo që ka ndodhur dje dhe sot është tendencë për të marrë pushtetin jashtë rrugëve juridiko-kushtetuese.

“Është tendencë po ashtu për të marrë pushtetin në kundërshtim të plotë me vullnetin e sovranit dhe në kundërshtim me legjitimitetin që gëzon qeveria e kryeministrit Kurti”, tha ai, përcjell Telegrafi.

Zyrtari i Vetëvendosjes thotë se do të presin hapat e ardhshëm që do të ndërmerr presidenti për të vepruar.

“Ne nuk e kemi refuzuar mandatarin për kryeministër Presidentit”.

Zëvendësministri i Integrimeve Evropiane thotë se po shkohet drejt një rruge që s’ka mbështetje të popullit e as mbështetje në Kushtetutë për formimin e qeverisë.

Kryeziu thotë e Presidenti në raundin e parë nuk ka asnjë diskrecion t’iu drejtohet subjekteve tjera politike pasi sipas tij ai është dashur të kontaktojë vetëm me Vetëvendosjen.

“Gjykata Kushtetuese e ka shënuar që mandatari i takon vetëm partisë së parë”, tha mes tjerash Taulant Kryeziu./Telegrafi/