Conte: Juventus-Inter, ndeshje e madhe edhe pa tifozë

Antonio Conte ka thënë se Interi është përgatitur për ndeshjen derbi ndaj Juventusit, e cila do të zhvillohet të dielën mbrëma pas dyerve të mbyllura shkaku i Coronavirus dhe sipas trajnerit kjo do të jetë gjithmonë një ndeshje e madhe.

Trajneri i Interit ka folur para sfidës së madhe të Derby D’Italia, ndeshje që do të zhvillohet në Juventus Stadium nga ora 20:45.

“Ne jemi të përgatitur për këtë ndeshje, megjithë vështirësitë, sepse ndryshimi i planeve dhe mos-luajtja e ndeshjeve nuk ka qenë e lehtë”, ka thënë fillimisht Conte për Inter TV.

“Siç u thashë djelmoshave, duhet të bëjmë mirë në këto situata që të përshtatemi shpejt dhe të vazhdojmë të punojmë shumë. Lojtarët janë të jashtëzakonshëm, pasi janë gjithmonë të gatshëm të sakrifikojnë dhe rrisin nivelin, në mënyrë që të luajmë këto ndeshje që do të thotë shumë për kreun e tabelës”.

Derby d’Italia ishte menduar të ishte një javë më parë, por ajo u shty për shkak të shpërthimit të Coronavirus, pastaj u riorganizua pas dyerve të mbyllura.

“Është e pashmangshme që tifozët të jenë një komponent i rëndësishëm kur luan futboll, veçanërisht në ndeshje të tilla të mëdha. Sidoqoftë, në këtë moment shumë delikat, shëndeti i qytetarëve vjen i pari dhe ne duhet të përshtatemi për të siguruar që gjërat të bëhen sa më të sigurta që është e mundur”.

“Është një situatë e ndërlikuar, të gjithë kemi familje dhe nuk mund të injorojmë atë që po ndodh. Duke thënë këtë, është e rëndësishme që profesionistët të njohin datën e lojës dhe të kenë një plan të qartë”.

⚽️ | ORA!

Il calcio d’inizio si avvicina, il battito cardiaco aumenta 🖤💙#ForzaInter #JuventusInter pic.twitter.com/Uo3dHRzmwZ

— Inter (@Inter) March 7, 2020

Juventusi donte të luante vetëm me tifozët vendas, sepse në atë kohë shkalla e rasteve kishte rënë ndjeshëm në Torino, por përfundimisht situata u bë aq serioze sa që të gjitha ndeshjet e Serie A do luhen me dyer të mbyllura deri më 3 prill.

Kjo do të thotë që Conte do të kthehet në Juventus Stadium për herë të parë si kundërshtar dhe do të përshëndetet nga heshtja totale.

“Në mënyrë të pashmangshme, detajet bëjnë ndryshimin në ndeshje si kjo. Ne e dimë që jemi kundër një skuadre shumë të fortë, kështu që kemi respekt për atë që po bën Juventusi. Sa për ne, ne kemi dëshirën dhe ambicien për t’iu afruar sa më shumë atyre me punë të palodhshme”.

“Juventus-Inter do jetë gjithmonë një ndeshje e madhe, por gjëja e rëndësishme është që tani kjo nënkupton shumë edhe për kreun e tabelës. Kjo është dëshmi për punën që kemi bërë dhe unë gjithmonë do të jem mirënjohës për lojtarët për ambicien e tyre”, përfundoi trajneri i Interit. /Telegrafi/