Rasti Griezmann: Atletico Madridi tronditë Barcelonën, zbulon bisedimet e fshehta të katalunsave me lojtarin dhe bllokon transferimin

Atletico Madridi nuk e ka pritur aspak mirë deklaratën e presidentit të Barcelonës, Jose Maria Bartomeu, ku ky i fundit zbuloi se ka pasur takim me drejtuesit e këtij klubi për Antoine Griezmann.

Klubi madrilen ka reaguar me anë të një komunikate për shtyp ku ka akuzuar Barcelonën dhe lojtarin për negociatat e hershme që kishin filluar midis palëve që në muajin shkurt.

Në fund të komunikatës Atletico ka treguar se e ka njoftuar Griezmannin se duhet të paraqitet në fundjavë në ambientet e klubit për të filluar stërvitjet.

Deklarata e Atletico Madridit

Duke marrë shkas nga deklaratat e bëra sot nga presidenti i Barcelonës, Jose Maria Bartomeu në lidhje me lojtarin tonë Antoine Griezmann, Atletico kërkon të bëjë publike detajet e mëposhtme:

Më datë 14 maj, Antoine Griezmann informoi drejtuesin Miguel Angel Gil Marin, trajnerin Diego Simeone dhe drejtorin sportiv Andrea Berta mbi vendimin e tij për t’u larguar nga klubi në fund të sezonit. Në ditët e mëvonshme ne mësuam se lojtari kishte arritur një marrëveshje në muajin mars me Barcelonën, vetëm pak ditë pas eliminimit tonë nga Liga e Kampionëve ndaj Juventusit, si dhe negociatat për kushtet e kontratës kishin filluar që në mes të muajit shkurt.

Lidhur me një deklaratë të bërë sot nga presidenti Bartomeu, ne duam të informojmë se është e vërtetë që ditën e djeshme ka pasur një takim midis Miguel Angel Gil Martin dhe drejtorit ekzekutiv të Barcelonës, Oscar Grau.

Official statement regarding FC Barcelona president Josep María Bartomeu's statements on Griezmann.https://t.co/0fxahHPAK9

— Atlético de Madrid (@atletienglish) July 5, 2019

Në atë takim Barcelona shprehu dëshirën që të aktivizojë klauzolën e largimit të Antoine Griezmann, sapo kjo klauzolë të zbresë nga 200 milionë euro në 120 milionë euro, ndër të tjera u kërkua një shtyrje e pagesës së klauzolës së lartpërmendur.

Natyrisht përgjigja jonë ishte negative, kjo për faktin se sjellja e klubit të Barcelonës dhe lojtarit ka qenë fyese për Atleticon Madridin dhe fansat tanë.

Si rezultat i gjithë kësaj, sot, Atletico Madrid, i ka kërkuar lojtarit nëpërmjet motrës së tij që është njëkohësisht agjente e Grirzmann, që ai të paraqitet të dielën në ambientet e klubit për të qenë pjesë e fazës përgatitore bashkë me pjesën tjetër të shokëve, diçka të cilën e ka të detyruar bazuar në kontratën që ekziston midis palëve.

Me anë të kësaj komunikate për shtyp , Atletico Madridi dëshiron të shprehë pakënaqësinë e madhe për sjelljen e  Barcelonës, që bindi lojtarin tonë të shkëputej nga ne gjatë zhvillimit të sezonit, në një moment kur klubi ishte në garë në Ligën e Kampionëve , por edhe në kampionat ndaj vetë Barcelonës, diçka kjo që mendojmë së është në shkelje të rregullave të vendosura për periudhat e negociatave për lojtarët dhe që cenojnë integritetin e garës.

Tashmë transferimi i Griezmann te Barcelona ka marr dimension tjetër dhe duket se po futet në një rrugë të rrezikshme. /Telegrafi/